"Sherqiy türkistan jumhuriyet küni" xatirisige béghishlan'ghan tebriknamiler

Muxbirimiz gülchéhre
2013-11-13
Share
jumhuriyet-kuni-washington-yighin.jpg Amérikidiki Uyghurlar, bir qisim chet'ellikler we chet'eldin kelgen Uyghur méhmanlar amérika dölet mejlisi binasida sherqiy türkistan jumhuriyetlirini xatirilidi. 2013-Yili 12-noyabir, washin'gton.
RFA


Wetinining azad bolghan künlirige shahit bolush yeni hayat chéghida azad sherqiy türkistanni körüsh, bu yolda hijret qiliwatqan Uyghur pa'aliyetchilirining ortaq arzulirining biri bolsa kérek.

Arimizda elwette azad sherqiy türkistanda tughulup ösken, erkin sherqiy türkistan hawasidin nepes élip ösken,"Uyghur xelqim tarix betlirige yene qaytidin musteqil dölet qurghan shanliq sehipilerni yazidu" dégen ümid bilen yashawatqan moysipitlarmu yoq emes.

Amérikigha eng burun yerleshken, 80 ning qarisini alghan bolsimu hazirgha qeder Uyghur dawasi yolida charchimay yürüwatqan ghulamidin paxta aka, 12 - noyabir, amérika dölet mejlisidiki jumhuriyet künini xatirilesh murasimigha qatnashqan sorun ehlige öz kechmishi bilen tarixni eslitip közlerni nemlidi.

Amérika dölet mejlisi ezasi frank wolf ependi gerche xizmet sewebi bilen Uyghurlarning bu jumhuriyet künini tebriklesh pa'aliyitige qatnishalmighan bolsimu, Uyghur milliy herikiti rehbiri rabiye qadir xanimgha hörmet - éhtiram bilen mektup yollighan bolup, uning mektupi sorun ehlige oqup ötüldi.

Mektupta munular bildürüldi: "Hörmetlik rabiye qadir xanim, men mushundaq tarixi minutlarda siz we bashqilar bilen birge sorun'gha jem bolalmighanliqimdin bekmu epsuslandim, sizning awazingiz xitay hökümitining Uyghurlargha yürgüzgen depsendichiliklirini anglitishta zor rol oynap keldi, hetta bizning dölet ishlar ministirlikimizmu xitayning Uyghurlarning diniy erkinlik, söz erkinliki qatarliq insaniy - heq hoquqlirigha qarita qattiq basturush élip bériwatqanliqini étirap qildi.

Xitay hökümiti Uyghur we bashqilargha qaratqan depsendichiliklerni sanap tügitelmeymiz. Shundaqtimu men zorawan xitay hökümitining basturushliri astida éziliwatqan xelqlerge hörlükke érishidighan bir künning kélishini tileymen, men amérika hökümiti, amérika dölet ishlar ministirlikini awazi tunjuqturulghan xelqlerning awazi bolushqa dewet qilishni dawamlashturimen."

Murasim riyasetchisi alim séyitof ependi teripidin Uyghurlarning yéqin dosti dep tonushturulghan gérit wén ependi, teywenning amérikidiki ish béjirish ornining meslihetchisi bolush süpiti bilen tebrik sözi qildi. Uning tebrik nutqi alim séyitof ependi teripidin sorun ehlige Uyghur tilida terjime qilindi.

U mundaq dédi: "Xitay teywen, tibet, Uyghur xelqlirige zorawanliq qilish arqiliq muqimliqni ishqa ashurimen dep chüsh körüwatidu, xitay muqimliqni zorawanliq emes, belki her birimizge erkinlik, öz özini bashqurush hoquqini bergende andin ishqa ashidu,...... Biz özimizning bu zorawan düshminige hemkarliship qarshi turushimiz kérek! sherqiy türkistan dölitinglarning tughulghan künini qizghin tebrikleymen biz her zaman hemkarlishishqa teyyarmiz."

Murasim axirlishishqa yéqin Uyghurlarning jumhuriyet künini qutluqlash murasimigha qatnashqanliqidin intayin xushalliq hés qiliwatqanliqini ipadilep söz qilghan xitay démokratik teshkilat wekilliridin, amérikidiki"Puqralar küchi" teshkilatining wekili dawid wu, teshkilat re'isi yang jyenlining birleshken döletler teshkilati aldida xitayning kishilik hoquq kéngishige eza bolup kirishige qarshiliq namayishqa yétekchilik qiliwatqanliqi seweblik bu meydanda bolalmighanliqi heqqide chüshendürüsh bérip ötti.

U mundaq dédi:"Men bügün, xitay puqralar küchi teshkilatigha wekil bolush süpitim bilen bizning bu dewada Uyghurlar bilen bir ikenlikimizni silerni qollaydighanlirimizni bildürmekchi. Xitayning meqsiti Uyghur bolsun, tibet bolsun, xitay bolsun hemmimizni parchilap yoqitish. Biz buninggha yol qoymasliqimiz kérek. Biz birlik - hemkarliq arqiliq xitay hökümitining basturushlirigha qarshi turushimiz kérek."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet