Shiwétsariye axbarati : shi jinping xelqtin qorqmaqta

Ixtiyariy muxbirimiz ekrem
2016-03-04
Share
zhang-zemin-we-xi-jinping-xitay-emeldarliri-305 Sabiq xitay sékrétari jyay zémin we eyni waqittiki mu'awin re'is shi jinping.
Anglighuchilirimiz teminligen.

Shiwétsariyede neshrdin chiqidighan néu'e zürcher géziti"de 3 - mart élan qilin'ghan "Shi jinping xelqtin qoruqmaqta" namliq maqalide, xitay hakimiyitining xelqtin ayrilip qalghanliqi otturigha qoyuldi.

"Shi jinping xelqtin qorqmaqta" namliq bu maqale, yéqinda zor tesir qozghighan xitaydiki yer - mülük sodigiri rén jichyangning tor bette sözligen nutqini analiz qilish asasida hazirlan'ghan bolup, maqale "Shi jinpingning birla rétsipi bar, u bolsimu, meyli partiye ichi yaki jem'iyette bolsun, héchqandaq qarshi pikir bolmasliqi lazim. Bolidiken, bésim her qachanqidek yenila küchlük" dégen ibariler bilen bashlan'ghan.

Maqalide xitayning xelq üstidin yürgüziwatqan bésim siyasitige gherb ellirining süküt qilmasliqi telep qilin'ghan. "Gherb elliri xitay bilen bolghan munasiwette, xelqning heq - hoquqining depsende qilinishida qizil siziqtin éship ketkenlikini ochuq otturigha qoyushi, bu arqiliq xitaydiki rén jichyanggha oxshash kishilerning pikir erkinlikige kapaletlik qilishi we kelgüside " gherblikler bizni untup, bir bürjekke tashliwetti" déyishining aldini élish" ni teshebbus qilghan.

"Shi jinping xelqtin qorqmaqta" namliq bu maqalide ilgiri sürülüshiche, xitaydiki bay sodiger rén jichyang "Ikki omumi yighin" échilishtin ilgiri tor bette pikir bayan qilip "Xitay xelqi untulup, bir bürjekke tashliwétildi" dégen. U sözide, shi jinping hakimiyitining xelqtin barghanséri ayrilip qéliwatqanliqini, xelqtin qorqiwatqanliqini, bésim siyasitining chek - chégrilardin halqip ketkenlikini, özining xitayning kelgüsidin endishige chüshkenlikini bayan qilghan. Uning nutqi xitayda zor ghulghula qozghighan we hökümet tereptin derhal cheklen'gen. Xitay xelqi uninggha "Rén zembirek" dégen leqemni qoyiwalghan.

Emma bu, uning ijtima'iy taratqularda axirqi qétim pikir bayan qilishi bolup qalghan. Bu sewebtin, uning tor bet adrisliri taqilip, yerlik hökümetler teripidin "Partiye intizamigha éghir derijide xilapliq qilghan, kompartiyening inawitini tökken, qutratquluq qilghan" dégendek ataqlarda eyiblen'gen. Biraq, hakimiyet teripidin uninggha chare körülgenliki téxi melum emes.

Gérmaniye awazining 3 - mart bu heqtiki xewerdin neqil élip bayan qilishiche, "Shi jinping xelqtin qoruqmaqta" namliq bu maqalide yene, xitaydiki baylarning üchtin ikki qismining bashqa döletke köchmen bolup bolghanliqi yaki köchmen bolushning pilanini tüzüp bolghanliqi otturigha qoyulghan. Xitaydiki baylarning köchmen bolushidiki seweblerni "Perzentlirini yaxshi ma'arip terbiyisige ige qilish, sap hawa, pakiz yimeklik bilen béqish" déyilgen hemde tilgha élinmighan muhim bir sewebning "Mal - mülkining dexli - teruzgha uchrishidin saqlinish" ikenliki otturigha qoyulghan.

Gérmaniye awazining xewiride yene, shi jinpingning meqsitining 21 - esirdimu xitayni kompartiye hökümranliqidiki dölet halitide tutup turush ikenliki eskertilgen. "Shi jinpingning xitayni qudretlik bir döletke aylandurush üchün siyasiy jehette heriket iqtidari bolghan, iqtisadiy jehette tereqqiy qilghan, jem'iyet muqim bolghan" bir weziyetke éhtiyaji barliqi hemde buning üchün herqandaq shekildiki öktichi pikirge qarshi turidighanliqi tekitlen'gen.

Xelq'ara kishilik hoquq teshkilati ijra'iye komitéti ezasi, xongkongluq xitay ziyaliysi manyan, rén jichyangning pikrini qollap, shi jinpingning siyasiti heqqide pikir bayan qilip "Uning néme oylawatqanliqini héchkim bilmeydu" dédi. U sözide, " Shi jinping bir tereptin xelqning könglini utush üchün chirik emeldarlargha zerbe bérishni dawamlashturiwatidu, yene bir tereptin kishilik hoquq pa'aliyetchilirini, adwokatlarni tutqun qilip, xelqning yürikini mujiwatidu. Shi jinpingning tüp meqsiti؛ omumiy xelqning ishenchi we himayisidin ayrilip qalghan kompartiye hakimiyitini saqlap qélish we mustehkemleshke merkezleshmekte" dédi.

Firansiyelik xitayshunas mari holizman xanimmu bu heqte ziyaritimizni qobul qilghanda, shi jinping hökümitining xelqning düshminige aylinip qalghanliqining bir ré'alliq ikenlikini ilgiri sürdi. U sözide, " Shi jinping hökümiti xelqni özige düshmen'ge aylanduridighan zorawanliq siyasitini dawamlashturiwatidu. Öz xelqi bilen düshmenleshken hakimiyetlerning qanchilik herbiy quwwiti, maliye quwwiti bolushidin qet'iynezer, u haman bir küni halaketlik teqdirdin qutulalmaydu" dédi.

Xitaydiki bay sodiger rén jichyang heqqidiki xewerler yalghuz xitayda meshhur bolupla qalmastin, gherb elliri axbarat wastiliridimu ilgiriki heptiler keng teshwiq qilin'ghan idi. B b s ning bu heqtiki xewirige asaslan'ghanda, xitayning "Yershari waqti" tori öz waqtidila uning pikrige inkas qayturup, rén tilgha alghan gherbche qimmet qarishigha reddiye bergen. Biraq bu reddiye rénning nutqi bilen qoshulup tor betlerdin öchürüp tashlan'ghan.

B b s xewiride tilgha élinishiche, rén jichyang 1951 - yili sendung ölkiside tughulghan. Uning dadisi rén chüensing öz waqtida xitay soda ministirliqining mu'awin ministiri bolghan. 1981 - Yilidin bashlap, rén jichyang yer - mülük sodisi bilen shughullinip, xitaydiki dangliq baylarning birige aylan'ghan. 2016 - Yili 2 - ayda shi jinping kompartiye igidarchiliqidiki axbarat wastilirining partiyige teweliki we partiye üchün xizmet qilishi lazimliqi heqqide sözligendin kéyin, rén jichyang itiraz bildürüp, axbarat wastilirining xelq üchün xizmet qilishi lazimliqini tekitligen hemde "Partiyining barliq axbarat wastiliri tewelikke ige boluptu, u xelq menpetige wekillik qilmighan chaghda, xelq untulup, bir bürjekke teshliwétilidu" dégen.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet