Obzorchi jang ping: xitay fashizmgha qarshi urush ghelibisini fashistik usulda tebriklimekchi

Gérmaniyediki musteqil obzorchi jang ping, xitay hökümitining fashizmgha qarshi urushning 70 yilliqini fashistik usulda tebriklimekchi boluwatqanliqini emeliy misalliri bilen otturigha qoydi.

20 - Awghust gérmaniye dolqunliri radi'osida “Fashizmgha qarshi turushmu, yaki fashizmning ghelibisimu?” namliq obzor élan qilindi. Gérmaniyede yashawatqan musteqil obzorchi jangping bu obzorida, armiyeni küchlendürüsh, jem'iyet kontrolini kücheytishte chékige yetken xitay hökümitining fashizmgha qarshi urushning 70 yilliqini tebriklesh üchün fashistik usullarni qolliniwatqanliqini emeliy misalliri bilen otturigha qoydi.

Mesilen: tamaq yéyish üchünmu tizimgha aldurush. Béyjing saqchi da'irilirining buyruqi bilen herbiy parat meshiqi mezgilide béyjingdiki ashxanilarda üstel zakaz qilip tamaq yéyish üchün kishilerdin kimlik nomurini, téléfon nomurini tizimlitish tüzümi yolgha qoyulghan. Bu tüzüm torxanigha kirish üchün tizimlitish, qingraq sétiwélish üchün tizimlitish, zukam dorisi élish üchün tizimlitishtin kéyinki yene bir bimene tüzüm.

Fashizmgha qarshi urushning 70 yilliqini xatirilesh üchün ötküzülidighan herbiy parat 9 - ayning 3 - künige orunlashturulghan bolup, jang pingning bayan qilishiche, béyjingning hawa kilimatining süpitige kapaletlik qilish üchün 8 - ayning 28 - künidin 9 - ayning 4 - künigiche béyjing, tyenjin, xébéy, ichki mongghul, shendung, senshi, xénen qatarliq 7 ölkidiki 10 mingdin artuq zawut, karxanilar ishtin toxtaydiken. Yene 9 mingdin artuq qurulush waqtinche ish toxtitidiken. Shendunggha yéqin bolghan jyangsu qatarliq ölkilerdiki polat zawuti, kömür kanlirimu karxanilirimu ishtin toxtaydiken. Iqtisadiy tereqqiyati chékinish basquchigha kirgen xitay üchün buning qanchilik ziyandin dérek béridighanliqi bilen hökümet hésabliship olturmaydiken. 9 - Ayning béshidin bashlap yene ammiwi köngül échish, muzéylarni ziyaret qilish, köngül échish xaraktéridiki téléwizor programmilirini qoyushmu cheklinidiken. Bu cheklimilerdin ejeblen'gen xitaylar tor betliride “Bu fashizmgha qarshi turushmu yaki fashizmning ghelibisimu?” dep yézishqan.

Obzorda yene xitay hökümitining fashizmgha qarshi urushning 70 yilliqini tebriklesh harpisida türkümlep kishilik hoquq pa'aliyetchilirini qolgha alghanliqi, axbarat we tor bet erkinlikini yenimu ilgirilep qamal astigha alghanliqi, tarixiy ré'alliq burmilan'ghan filimlarni zor türkümde bazargha salghanliqi, bularning bundin 70 yil ilgiriki fashizmliq idé'ologiye, medeniyet we tüzüm bilen tüptin oxshashliqi tekitlen'gen shundaqla kompartiyening karniyi bolghan “Xelq géziti” ning chong serlewhilik qilip “Junggo chüshi qudretlik armiye chüshini öz ichige alidu, qudretlik armiye chüshi junggo chüshige yölek bolidu” dep, wetenperwerlik we milletchilikni jénining bariche terghib qiliwatqanliqini, buning fashizmdin artuq bir perqining yoqluqini ilgiri sürgen.

D u q mu'awin re'isi ümid agahi ependi bu heqte ipade bildürüp, xitayning özining bir fashistik tüzümdiki dölet ikenliki, uning fashizmgha qarshi urushning ghelibisini tebriklesh salahiyiti yoqluqini tekitlidi. D u q teshwiqat - neshriyat komitéti mudiri perhat muhemmidi ependimu bu heqte öz qarashlirini bildürüp ötti.

Jang pingning qarishiche, herbiy parat gherb üchün modidin qalghan bir heriket. Hazir gherbte herbiy paratning ornini en'eniwi usullar igilidi. Herbiy paratning esli meqsiti düshminige heywe körsitish, öz küchini debdebe qilish. Xitay dunyaning ijabiy inkasigha érishelmeydighan bir bihude pa'aliyet üchün nurghun iqtisad hem waqit israp qilmaqta.