xitayning uyghur aptonom rayonluq ma'arip nazariti tor bétining 23-iyul xewirige qarighanda, chetellerdiki «shinjangliq oqughuchilar alaqe ponkiti» deslepte amérika, firansiye, awstraliye, yaponiye we rusiyedin ibaret besh dölette ish bashlighan.
bu heqtiki xewerde «shinjang aptonom rayoni chetellerde qurghan bu alaqe ponkitliri arqiliq chetellerdiki shinjangliq ixtisas igiliri we ziyaliylar bilen alaqe baghlap,ularni uyghur élige qaytip xizmet qilishqa righbetlendürüsh we ular arqiliq shinjangni chetellerge tonushturushqa oxshash pa'aliyetlerni élip baridu» dep körsitilgen. uyghur amérika birleshmisining mu'awin re'isi ilshat ependining inkasigha qarighanda, yéqinda xitay da'iriliri amérikini öz ichige alghan bir qisim ellerde uyghurlar bilen yoshurun haldiki alaqe ornitishni meqset qilip mexsus adem ewetip heriket bashlighan bolsimu netijige érishelmigen, eksiche uyghur jama'itining nepriti we hoshyarliqini ashurghan.
söhbitimiz jeryanida élshat hesen ependi uyghurlarni xitayning jasusluq heriketlirige qarita hoshyar bolushqa we özi yashawatqan döletlerdiki qanunlardin paydilinip özini qoghdashqa agahlandurdi we yene xitayning her xil nam, her xil taktika qollinip chetellerdiki uyghur herikitini parchilash, uyghur teshkilati we uyghur jama'iti ichige ittipaqsizliq yaghdurushni meqset qilip élip bériwatqan istratégiyilik jasusluq heriketlirige qarshi segeklik bilen turushqa, uyghurlarning ortaq menpetini qoghdashta insaniy we milliy burchini ada qilishqa chaqirdi.
yuqiridiki awaz ulinishidin, muxbirimizning ilshat hesen ependi bilen bu heqte ötküzgen söhbitige diqqet qilghaysiler.