Хитайниң 3 - сентәбир өткүзгән һәрбий парати инкас қозғиди

Мухбиримиз меһрибан
2015-09-04
Share
yapongha-qarshi-ghelbe-parat-1.jpg Хитай әскәрлири, 3-сентәбир күни өткүзидиған японға қарши уруш ғәлибисиниң 70 йиллиқини тәбрикләш мурасимида параттин өтүшкә тәйярлиқ қилмақта. 2015-Йили 23-июл, бейҗиң.
XINHUA


Хитай һөкүмити 3 - сентәбир бейҗиңда зор көләмлик һәрбий парат өткүзүп, японға қарши урушниң 70 йиллиқини хатирилиди. Бу қетим өткүзүлгән һәрбий паратқа америка вә ғәрп демократик дөләт башлиқлириниң қатнашмаслиқи, хитай рәиси ши җиңпиңниң мурасимда 300 миң хитай әскирини қисқартидиғанлиқи һәққидики нутқи қатарлиқлар хәлқара мәтбуатларниң вә хитай вәзийәт күзәткүчилириниң диққитини қозғиди. Диққитиңлар мухбиримиз меһрибанниң программисида болсун.

Хитай һөкүмити узундин буян тәйярлиқ қиливатқан аталмиш японға қарши урушниң 70 йиллиқини хитирләш намидәики һәрбий парат, қаттиқ бихәтәрлик тәдбирлири ичидә түнүгүн бейҗиңда өткүзүлди. Хитай мәркизи теливизийисида бу қетимқи һәрбий парат һәққидә 3 саәтлик мәхсус программа нәқ мәйдандин дуняға тарқитилди.

Парат аяқлашқандин буян хәлқара мәтбуатларда вә чәтәлләрдики хитай демократлириниң тор бекәтлиридә, бейҗиңдә өткүзүлгән парат һәққидә анализ вә мулаһизиләр елан қилинмақта.

Бу анализларда, хитайда пай чеки базирида зиян көрүлүп, хитай иқтисадида чекиниш болуватқан мәзгилдә, шиҗиңпиң һөкүмитиниң милйон долларлиқ иқтисат сәрп қилип бундақ чоң һәрбий паратни өткүзүштики мәқсити; мурасимға русийә, оттура асиядики җумһурийәтләр, пакистан, судан, җәнубий корийә қатарлиқ әлләр дөләт башлиқлири қатнашқандин башқа америка вә асаслиқ ғәрб дөләт башлиқлириниң қатнашмаслиқи; мурасимда нөвәттә чәтәлләрдики хитай демократлири арисида муназирә темиси боливатқан хитай һакимийәт қатлимидики икки гороһ күрүшидики җиаң земин тәрәпдарлириниңму рәси сәһнисидин орун елиши;нөвәттики хитай рәиси ши җиңпиңниң өзи ялғуз аптомобилда айлинип паратни көздин кәчүрүши ; вә хитай рәиси ши җиңпиңниң дуняға 300 миң хитай әскирини қисқартидиғанлиқини җакарлиши қатарлиқ мәсилиләр муназирә темиси болди.

Ғәрп мәтбуатлирдин евйорк вақти гезити, вашингитон почтиси,ройтерс, әнгилийә б б с агнтлиқи, германийә долқунлири, франсийә агентлиқи, америка авази қатарлиқларда хитайниң һәрбий манивериниң хитайниң шәрқий җәнубий асиядики японийә филиппин қатарлиқ қошна дөләтлиригә вә америка қатарлиқ ғәрп дөләтлиригә өзиниң һәрбий күчини көрситиш икәнлики тилға елинип, хитай рәси ши җиңпиңниң 300 миң әскәрни қисқартидиғанлиқи һәққидики баяниниң әмилийәттә "қуруқлуқ армийә пиядә әскәрлиригә сәрп қилидиған иқтисатни һәрбий техника сәрпийити үчүн ишлитишни мәқсәт қилғанлиқи; хитайда иқтисат төвәнләватқан, хитайдики иҗтимаи мәсилиләр көпийиватқан, мәзгилдә хитяйниң "японға қарши урушниң 70 йиллиқини хатириләш" намида, хитай пуқралирида барғанчә күчийиватқан һөкүмәткә болған наразилиқ кәйпиятини башқа яққа нураш қатарлиқ көп тәрәплимә мәқсәтләрдә елип берилғанлиқи оттуриға қоюлди.

Хитай вәзийәт анализчилиридин ваң күн әпәнди тәрипидин йезилған "шиҗиңпиңниң 3 - сентәбир параттни көздин кәчүрүшидики үч нуқта "сәрләвһәлик мақалисида, ши җинпиң һөкүмити өткүзгән һәрбий паратниң хитайниң һәрбий күчини көрситип өз әтрапидики қошнилириға һәйвә қилиш болупла қалмастин, техиму муһими хитай дөлитиниң ички қисмиға қаритилғанлиқи тәкитләнди.

Чәтәлләрдики сиясий вәзийәт анализчилиридин америкидики уйғур сияси паалийәтчиси елшат һәсән әпәнди зияритимизни қобул қилип, хитайниң һәрбий парати һәққидә ғәрп мәтбуатлирида оттуриға қоюливатқан мулаһизиләр вә хитай демократлириниң қарашлири һәққидә тохталди.

Елшат һәсән әпәнди баянида ғәрп мәтбуатлирда оттуриға қоюлған қарашларниң асаслири үстидә өз анализини баян қилип, ши җиңпиңниң хитай иқтисадий төвәнләватқан, хитай хәлқи вә дуя җамаәтчилики хитай иқтисадиниң тәсиридин әнсирәватқан шараитта, ши қиңпиң һөкүмитиниң зор мәбләғ сәрп қилип бундақ чоң һәрбий парат өткүзүши, хитай ичидә өз һакимийитини мустәһкәмләш, хәлқараға хитайниң һәрбий күчини көрситип, қошнилириға һәйвә қилиш икәнликини билдүрди.

Елшат әпәнди йәнә ши җиңпиң тилға алған 300 миң әскәрни қисқартиш вә бу һәқтә ғәрп мәтбуатлири вә хитай демократлириниң мулаһизилири һәққидә тохталди.

Елшат әпәндиниң қаришичә, бу мәсилидә ғәрп мәтбуатлирида елан қилинған " хитай һөкүмитиниң бир қисим әскәрни қисқартиши, техиму көп иқтисатни һәрбий техника сәрпийити үчүн ишлитишни мәқсәт қилған" дегән қарашниң әмилийәткә уйғун икәнликини, хитай демократлири тилға алған " шиҗиңпиңниң 300 миң әскәрни қисқаритиштики мәқсиди дөләт ичидики җиаң земин тәрәпдарлириниң һәрбидики күчини тазилаш" дегән қарашниң мәлум асасқа игә болсиму, әмма ши җиңпиңниң йәнила хитай коммунист һакимийитиниң мәнпәәти мәсилисидә җияң земин қатарлиқ илгирики хитай рәхбәрлири билән ортақлиқи вә бағлиниш болғини үчүн, униң җияң земин гуроһидикиләргә қаратқан зәрбә бериш һәркитини у қәдәр кеңәйтивәтмәйдиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт