Гуаңшидики бир дохтурхана чиқарған “террор гумандарлири” һәққидики җиддий уқтуруш күчлүк ғулғула қозғиди

Мухбиримиз қутлан
2015.04.15
terror-gumandar-guangshi.jpg Гуаңши җуаңзу аптоном районлуқ ана-балилар сақлиқини сақлаш дохтурханиси чиқарған “террор гумандар” лиридин һошяр болуш һәққидики җиддий уқтуруш. 2015-Йил 10-апрел.
Social Media

10-Апрел күни хитайниң гуаңши җуаңзу аптоном районлуқ ана-балилар дохтурханиси җиддий уқтуруш чиқирип, ишчи-хизмәтчиләрниң “шинҗаңлиқлар” ни көргән һаман қоғдаш бөлүмигә хәвәр қилишини тәләп қилған.

Бу уқтуруш мәзкур дохтурхана мәмурийити тәрипидин чиқирилип, дохтурханиниң тамғиси бесилған һәмдә “дохтурхана тәвәликимиздә террорлуққа қарши һошярлиқни күчәйтиш һәққидә уқтуруш” дегән мавзуда тарқитилған.

Мәзкур уқтурушта гуаңши тәвәликидә террорлуқ һуҗуминиң йүз бериш еһтималлиқини тилға елип, аммини “гуманлиқ кишиләр” гә алаһидә диққәт қилишқа чақирған. Уқтурушта мундақ үч түрлүк тәләп оттуриға қоюлған:

“биринчи, әтигән саәт 8:00 дин кәч саәт 17:30 гичә хизмәт орнида болидиған ишчи-хизмәтчиләр сәзгүрлүкни күчәйтип, ‛гуманлиқ кишиләр‚ ни, йәни ‛шинҗаңлиқлар‚ ни байиқиға һаман қоғдаш бөлүмигә хәвәр қилиши керәк. Иккинчи, кәч саәт 17:30 дин сәһәр саәт 8:00 гичә дохтурхана тәвәсидә чарлашни күчәйтип, ‛гуманлиқ кишиләр‚ ни, йәни ‛шинҗаңлиқлар‚ ни байқиған һаман кечилик нөвәтчи ишханисиға хәвәр бериш керәк. Үчинчи, ишчи-хизмәтчиләр иштин чүшкәндин кейин амал бар қору сиртидики паалийәтлирини вақитлиқ тохтитип, бихәтәрликкә диққәт қилиши керәк.”

Юқириқи уқтурушта “гуманлиқ кишиләр” дегән сөзни ишләткәндә тирнақ ичигә алаһидә қилип “шинҗаңлиқлар” дәп әскәртилгән.

Биз бу һәқтики учурларни дәлилләш үчүн гуаңши җуаңзу аптоном районлуқ ана-балилар дохтурханисиниң қоғдаш бөлүмигә телефон қилдуқ. Телефонни қобул қилған кечилик нөвәтчи хадим мәзкур уқтурушниң өткән җүмә күни, йәни 10-апрелда чиқирилғанлиқини, әмма икки-үч күн өтмәйла әмәлдин қалдурулғанлиқини билдүрди.

У йәнә дохтурханиниң мәзкур уқтурушни юқири дәриҗилик сақчи орунлириниң тәлипи бойичә чиқарғанлиқини, дохтурхана ишчи-хизмәтчилиридә “террорлуққа қарши” һошярлиқни турғузуш үчүн бу уқтурушни “маневир тәшвиқати” қилғанлиқини тәкитлиди.

Мәзкур дохтурханиниң баш нөвәтчи ишханисидики йәнә бир аял хадим телефонимизни қобул қилип, мәзкур уқтурушниң аллиқачан әмәлдин қалдурулғанлиқини, бу һәқтә давамлиқ сүрүштә қилмаслиқимизни ейтти.

Биз униңдин мәзкур уқтуруштики “гуманлиқ кишиләр” дәп сүпәтләнгән аталмиш “шинҗаңлиқлар” зади кимни көрситиду, бу сөз уйғурларға қаритилғанму-йоқ, дәп сориғинимизда, у буниңға бирнәрсә дейәлмәйдиғанлиқини билдүрди.

Мәзкур дохтурханиниң мәмурийәт ишханисидики бир аял хадимму телефонимизни қобул қилип, бу уқтуруштин хәвири барлиқини, әмма бу һәқтики тәпсилий мәлуматларни дохтурханиниң сиясий-тәшвиқат ишханисидин соришимизни ейтип телефонни қоювәтти.

Ахирида америка уйғур бирләшмисиниң рәиси алим сейтоф әпәнди бу һәқтә зияритимизни қобул қилип, гуаңшидики дохтурхана чиқарған мәзкур уқтуруш һәққидә баянат бәрди.

Тәпсилатини аваз улиништин аңлиғайсиз.

Көп көрүлгән хәвәрләр
Вәзийәт- мулаһизә
xitayche-xet
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.