Тарих таразисидин хитайниң 3-сентәбирдики һәрбий паратиға қоюлған соаллар

Пүтүн дуня хитайниң 3-сентәбирдә бейҗиңда өткүзмәкчи болған һәрбий паратиға гуман вә һәйранлиқ соал қоймақта.

Иккинчи дуня уруши ахирлишип аридин топ-тоғра 70 йил өткән бүгүнки күндә хитай һазирқи заман дуня тарихни қайта йезиватамду-қандақ? хәлқара фашизм сепини, болупму шәрқтики японийә милитаризмни мәғлуп қилған һәл қилғуч амил америкиниң тинч окяндики урушиму яки униң японийәгә ташлиған икки данә атом бомбисиму вә яки совет қизил армийисиниң манҗурийәгә киргән бир милйон кишилик қошуниму?

Әйни чағда қаһирә хитабнамисигә қол қойған үч дөләт рәһбириниң бири болған җаң кәйшиниң орниға бүгүнки күндә немә үчүн мавниң рәсими алмишип қалди?

Радиомиз зияритини қобул қилған америкидики уйғур зиялийси доктор җүрәт обул билән шиветсийәдики уйғур зиялийси абдушүкүр муһәммәт бу һәқтә өз қарашлирини баян қилди.

Улар бирдәк хитай компартийәсиниң тарихни астин-үстүн қилип, өз мәнпәити үчүн “сахта тарих” ясаватқанлиқини, 1945-йили японийәниң урушта мәғлуп болушида америка билән совет иттипақиниң һәл қилғуч рол ойниғанлиқини тәкитлиди.

Җүрәт обул әпәнди хитай 3-сентәбирдә өткүзмәкчи болған һәрбий паратниң шәкли вә мәзмуниниң әмәлийәттә әйни чағда натсистлар германийәсидә өткүзүлгән мушу шәкилдики һәрбий паратларға охшайдиғанлиқини селиштурма қилди.

Абдушүкүр әпәндиму пүтүн мәмликәтни сәпәрвәр қилип күч көрситиш, армийәни қозғап парат өткүзүштәк һәйвә тактикисиниң 1930-йилларда натсистлар германийәсидә, андин советлар иттипақида, кейинчә хитайда давамлашқанлиқини тилға алди.

Улар зияритимиз җәрянида мунуларни тәкитлиди: “бүгүнки күндә хитай компартийәси японға қарши урушниң ғәлибисини өзиниң қиливелишқа урунғини билән, мав зедоңниң 1970-йилларда японийәгә ейтқан рәһмити тарихниң әсли маһийитини ениқ чүшинишимизгә ярдәм бериду.”

“бүгүнки күндә хитай һөкүмитиниң қиливатқини хитай хәлқидә японийәгә қарши өчмәнлик вә қисасхорлуқни қозғаш болуватиду. Һалбуки, буниң әксичә японийә вә япон хәлқи әйни чағдики урушниң хата болғанлиқини етирап қилди, кәчүрүм сориди һәмдә буниңдин кейин йүз бериш еһтимали болған һәрқандақ уруштин сақлинишниң йолини издимәктә, халас.”

Тәпсилатини аваз улиништин аңлиғайсиз.