Қазақистан һөкүмитидики өзгиришләр һәққидә инкаслар

Қазақистан һөкүмитидә йүз бәргән өзгиришләр мунасивити билән аммиви ахбарат васитилиридә һәр хил көзқараштики пикир-инкасларниң елан қилиниши давам қилмақта.
Ихтиярий мухбиримиз ойған
2012.09.26
qazaqistan-saylam-Nursultan-Nazarbayev-305.jpg Қазақистан президенти нурсултан назарбайеф өзини қоллиғучилириға рәһмитини билдүрмәктә. 2011-Йили 4-апрел.
AFP

Мәлумки, қазақистан һөкүмитиниң баш министири кәрим мәсимоф дөләт президенти нурсултан назарбайеф намиға өз лавазимидин бошиниш тоғрилиқ әрз бәргән болуп, мәмликәт рәһбири 24-сентәбир күни бу әрзигә қол қойған. Көп вақит өтмәйла к. Мәсимоф қазақистан президенти мәмурийитиниң рәһбири лавазимиға, әмди һөкүмәт баш министири орниға болса серк ахметоф сайланған. С. Ахметоф илгәрки һөкүмәт тәркибидә баш министирниң биринчи орунбасари вәзиписини өтәвататти.

“сентир асия” тор гезитида елан қилинған “мәсимофниң вәзиписи қазақистанда йеңи мәзмундики сиясий вәзийәтни шәкилләндүриду” намлиқ мақалиниң аптори михайил пак к. Мәсимофниң йеңи лавазимиға баһа берип, президент мәмурийитиниң рәһбири вәзиписигә ички сиясәтниң бир қанчилиған мәсилилириниң киридиғанлиқини тәкитлигән. Униң ейтишичә, бу лавазимдики шәхс мәмликәттә йүз бериватқан көплигән вәқәләргә, шу җүмлидин, районлуқ рәһбәрләрни бәлгиләшкә, җай-җайларда қелиплашқан вәзийәтни көзитип, улар бойичә чариләр қоллинишқа, шундақла президент буйруқлирини орунлашқа өзиниң биваситә тәсирини йәткүзиду, йәни президент мәмурийити омумән дөләт рәһбириниң җай-җайлардики һакими болуп, у һөкүмәт министирлириға қариғанда техиму муһим вәзипиләрни атқурмақчи икән. Мақалә аптори қазақистан президенти мәмурийитиниң миллий бихәтәрлик комитети ишини назарәт қилиш, шундақла мәмликәт рәһбәрликидики қәбилиләр ара тәңпуңлуқни көзитиш вәзиписиниму өз алдиға қоялайдиғанлиқини билдүргән.

Русийиниң “риа новости” агентлиқида берилгән “назарбайеф қазақистандики һөкүмәт алмишишини чүшәндүрди” намлиқ мақалидә қазақистан президенти һөкүмәт өзгиришини мундақ дәп чүшәндүргән: “адәттә вәзийәт пишип йетилгәндә, мәмликәтниң иқтисади, иҗтимаий мәвқәси һалсизланғанда, җәмийәт тәләп қилғанда һөкүмәтни өзгәртиду. Биздә ундақ әмәс. Биздә премийер министир истепа һәққидә өтүнүш қилғанлиқи үчүн бу иш йүз бәрди, буни у өткән йилиму қилған иди. Адәм бир аз һарғанда һәм өз мәвқәсини өзгәртишни халиғанда, униң үстигә у йеңи адәм керәк дәп буни чүшәндүргәндә, мән уни чүшинип, истепасини қобул қилдим.” мақалидә ейтилишичә, н. Назарбайеф һәр бир адәмгә көп вақит вә күчниң кетидиғанлиқини етирап қилип, бу тәҗрибиниң бикар кәтмәслики үчүн к. Мәсимофни йираққа қоюп бәрмәй, президент мәмурийити башлиқи қилип бәлгилигән.

Русийиниң “московскийе новости” гезитиниң мәхсус мухбири аркадий дубнофму қазақистандики вәзийәткә өз баһасини берип, у мақалисини “қазақистанниң йәттинчи баш министири биринчи вәзир болди” дәп атиған. У қазақистан даирилириниң юқири басқучидики өзгиришләрниң мәмликәт рәһбәрликидики күчләр арисида орнитилған йеңи тәңпуңлуқтин һәмдә қазақистандики һәр хил қәбилиләр арисида кетип барған күрәшниң н.Назарбайеф тәрипидин назарәт астиға елинғанлиқидин дерәк беридиғанлиқини оттуриға қойған. А. Дубноф шундақла к. Мәсимофни русийә кәйпиятидики сиясәтчи сүпитидә қарап, униң йеңи лавазиминиң русийиниң һазирқи рәһбәрлирини қанаәтләндүридиғанлиқини илгири сүргән. Буниңдин ташқири, көплигән көзәткүчиләр к.Мәсимофниң таможна иттипақи вә бир пүтүн иқтисади бошлуқ даирисидә қазақистанниң русийә билән болған һәмкарлиқиға көп күч чиқарғанлиқиға юқири баһа бәрмәктә.

Әмди “нур к з” тор бетидә тонулған қазақистанлиқ сиясәтшунас дост көшимниң мәзкур вәзийәткә бәргән баһаси елан қилинған болуп, у мундақ дегән: “кәрим мәсимофни, раст, қазақ пуқралириниң көпчилики яқтурмиди. Бу яқтурмаслиқ мәсимофниң келип чиққан тегигә мунасивәтлик болмаслиқиму мумкин. Мәлум нәрсә, у һакимийәттә болған вақтида қазақ тили билән омумән миллий мәсилиләргә салқин қариди.” сиясәтшунас дост к. Мәсимофниң йеңи лавазимға сайлиниши һәққидә тохтилип, бу ишниң һәқиқий идеологийә билән зич бағлинишлиқ икәнликини һәм оңай вәзипә әмәсликини, бу йеңи орун алмаштурушлардин һеч нәрсини күтмәйдиғанлиқини билдүргән.

“тенгри нюс” агентлиқиниң мәлуматлириға қариғанда, қазақистан президентиниң мәслиһәтчиси йермухамет йертисбайеф болса к.Мәсимофниң йеңи лавазимда дөләт органлири вә һөкүмәт үстидин болған назарәтни күчәйтәләйдиғанлиқиға көз йәткүзгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.