Қазақистанда террорчилиқ хәвпиниң мәвҗут икәнлики иқрар қилинмақта

Қазақистанниң аммиви ахбарат васитилири һәм көзәткүчилири кейинки вақитларда мәмликәтниң һәр қайси җайлирида йүз бериватқан адәм өлтүрүшләр, қарақчилиқ һуҗумлар, партлашлар вә башқиму шуниңға охшаш вәқәләрниң террорлуқ һәрикәткә мунасивәтлик икәнлики әтрапида бәс-муназирә йүргүзмәктә.
Ихтиярий мухбиримиз ойған
2012.10.04

Безиләр буни нәқ “террорлуқ һәрикәт” дәп һесаблиса, безиләр буларниң барлиқиниң террорчилиқ билән мунасивити йоқ икәнликини оттуриға қойған. Ениқини ейтқанда, улар қазақистанда террорчилиқ барму дегән мәсилини ениқлашқа тиришмақта.

“сентир асия” тор бетидә елан қилинған людмила пискорскаяниң “қазақистанчә террорчилиқниң миллий алаһидиликлири-хәлипә солдатлири вә башқилар...” намлиқ мақалисидә тонулған сиясәтшунас йерлан каринға мураҗиәт қилғинида, у мундақ дегән:
‏-Мениңчә, мәмликәттә диний әсәбийлик вә террорчилиқ барму дегән темида бәс-муназирә қилиш вақти өтүп кәткәндәк көрүниду. Шәһәрлик политсийә башқармисиға қораллиқ һуҗум қиливатиду, һә, биз болсақ техичила бу немә дегән соални бериватимиз. Әлвәттә, сиясий һаятниң амили сүпитидә террорчилиқ йоқ, һазирчә униң көрүнүшиниң ениқ, уюшмилиқ шәклиму йоқ, әмма террорчилиқ хәвпи бар, бу мәсилигә мунасивәтлик ким вә немә десиму, у күнсанап өсмәктә. Ундақ болмиса, немә сәвәбтин ахирқи бәш йил ичидә “террорчилиқ” маддиси бойичә “террорлуқ топларни қурғанлиқи вә тәшкиллигәнлики үчүн”, “террорчилиқни тәшвиқ қилғанлиқи үчүн”, “террорлуқ һәрикәтләрни пиланлиғанлиқи үчүн” дегән ипадиләшләр билән онлиған адәм җинайи җавабкарлиққа тартилди? пәқәт 2012-йилниң биринчи йеримидила бу маддилар бойичә әлликтин ошуқ адәм сотқа тартилди! шуңлашқа, террорчилиқ билән күрәш елип бериливатқиниға қаримай, вәзийәт кәскинләшмәктә. Йеқинда атиравда политсийигә қилинған қораллиқ һуҗум буниңға дәлил болалайду.

Й.Карин қандақла болсун вәқәни “террорлуқ һәрикәт” дәп атаверишкә болмайдиғанлиқини, мундақ ипадиләшләрдә пәхәс болуш керәкликини, узақ вақит мабәйнидә өз кәсипдашлири билән бирликтә бу мәсилә үстидә шуғуллинип, даим қазақистан үчүн террорчилиқ вә диний әсәбийлик хәвпиниң мәвҗут икәнликини инкар қилип, әмди, әксичә, мундақ хәвпниң мәвҗут икәнликини һәм бу мәсилә әтрапида қаттиқ ишләш лазимлиқини илгири сүргән.

Қазақистанниң к т к телевизийә қанилиниң мухбири александир трухачйев “атирав областида үч мустәқил террорлуқ гуруппа һәрикәт қилған” намлиқ мақалисидә мәхсус органларниң мәлуматлириға асаслинип, бу районда һәрикәт қилған топларниң һәр қайсиға чәт әлләрдин рәһбәрлик қилинғанлиқини, бу җәрянда уларни биваситә атирав области турғунлириниң башқурғанлиқини билдүргән.

Қазақистанда диний әсәбийликниң тарқиливатқанлиқини “время” гезитидә бесилған “такфирларниң қанлиқ изи. Или-алатав миллий паркидики аммиви қирғинчилиқниң йеңи тәпсилатлири” намлиқ мақалиму дәлилләйду. Униңда ейтилишичә, мәзкур паркта йүз бәргән адәм өлтүрүш вәқәсиниң диний әсәбийлик гуруппилири тәрипидин әмәлгә ашурулғанлиқини мәмликәтниң ички ишлар министирлиқи етирап қилған. Политсийә идариси вәкиллири йәрлик аһалини мәзкур адәм өлтүргүчиләрниң қоралланғанлиқи вә интайин хәтәрликлики һәққидә агаһландурған болуп, террорчиларниң алмата области қарасай наһийисиниң таусамали мәһәллисигә орунлашқандин кейин, у йәрдә йүз бәргән партлашта бир қанчә аял киши вә балиларниң қурбан болғанлиқини, андин террорчиларниң или-алатав паркиға келип орунлашқанлиқини хәвәрлигән. Мәлуматларға қариғанда, улар мәзкур районда 12 адәмни өлтүргәндин кейин политсийә уларниң изиға чүшүп, улар маканлиған җайни қоршап һуҗум қилған. Нәтиҗидә 13 террорчи уҗуқтурулған, бир мәхсус әтрәт җәңчиси болса яриланған. Һазир бу ишқа алақиси бар йәнә икки киши издәштүрүлмәктә икән. Мақалидә ейтилишичә, анализчилар мәзкур террорчиларниң мәхсус тәйярлиқтин өтмигәнликини, һәрбий тәйярлиқниң адәттики қаидилирини билмигәнликтин партлиғуч маддиларни тәйярлаш мәзгилидә туюқсиз партлаш йүз берип, бир нәччә кишиниң өлүмигә сәвәб болғанлиқини илгири сүргән.

Мақалидә шундақла мәмликәттики террорлуқ һәрикәтлиригә мунасивәтлик өз вақтида чариләр қолланмиғанлиқтин, ахирқи бир йил ичидила йүздин ошуқ җинайәт йүз бәргәнлики һәм уларниң террорчилиқ билән алақиси барлиқи иқрар қилинған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.