Qazaqistanda térrorchiliq xewpining mewjut ikenliki iqrar qilinmaqta

Qazaqistanning ammiwi axbarat wasitiliri hem közetküchiliri kéyinki waqitlarda memliketning her qaysi jaylirida yüz bériwatqan adem öltürüshler, qaraqchiliq hujumlar, partlashlar we bashqimu shuninggha oxshash weqelerning térrorluq heriketke munasiwetlik ikenliki etrapida bes-munazire yürgüzmekte.
Ixtiyariy muxbirimiz oyghan
2012-10-04
Share

Béziler buni neq "Térrorluq heriket" dep hésablisa, béziler bularning barliqining térrorchiliq bilen munasiwiti yoq ikenlikini otturigha qoyghan. Éniqini éytqanda, ular qazaqistanda térrorchiliq barmu dégen mesilini éniqlashqa tirishmaqta.

"Séntir asiya" tor bétide élan qilin'ghan lyudmila piskorskayaning "Qazaqistanche térrorchiliqning milliy alahidilikliri-xelipe soldatliri we bashqilar..." namliq maqaliside tonulghan siyasetshunas yérlan karin'gha muraji'et qilghinida, u mundaq dégen:
‏-Méningche, memlikette diniy esebiylik we térrorchiliq barmu dégen témida bes-munazire qilish waqti ötüp ketkendek körünidu. Sheherlik politsiye bashqarmisigha qoralliq hujum qiliwatidu, he, biz bolsaq téxichila bu néme dégen so'alni bériwatimiz. Elwette, siyasiy hayatning amili süpitide térrorchiliq yoq, hazirche uning körünüshining éniq, uyushmiliq sheklimu yoq, emma térrorchiliq xewpi bar, bu mesilige munasiwetlik kim we néme désimu, u künsanap ösmekte. Undaq bolmisa, néme sewebtin axirqi besh yil ichide "Térrorchiliq" maddisi boyiche "Térrorluq toplarni qurghanliqi we teshkilligenliki üchün", "Térrorchiliqni teshwiq qilghanliqi üchün", "Térrorluq heriketlerni pilanlighanliqi üchün" dégen ipadileshler bilen onlighan adem jinayi jawabkarliqqa tartildi? peqet 2012-yilning birinchi yérimidila bu maddilar boyiche elliktin oshuq adem sotqa tartildi! shunglashqa, térrorchiliq bilen küresh élip bériliwatqinigha qarimay, weziyet keskinleshmekte. Yéqinda atirawda politsiyige qilin'ghan qoralliq hujum buninggha delil bolalaydu.

Y.Karin qandaqla bolsun weqeni "Térrorluq heriket" dep atawérishke bolmaydighanliqini, mundaq ipadileshlerde pexes bolush kéreklikini, uzaq waqit mabeynide öz kesipdashliri bilen birlikte bu mesile üstide shughullinip, da'im qazaqistan üchün térrorchiliq we diniy esebiylik xewpining mewjut ikenlikini inkar qilip, emdi, eksiche, mundaq xewpning mewjut ikenlikini hem bu mesile etrapida qattiq ishlesh lazimliqini ilgiri sürgen.

Qazaqistanning k t k téléwiziye qanilining muxbiri aléksandir truxachyéw "Atiraw oblastida üch musteqil térrorluq guruppa heriket qilghan" namliq maqaliside mexsus organlarning melumatlirigha asaslinip, bu rayonda heriket qilghan toplarning her qaysigha chet ellerdin rehberlik qilin'ghanliqini, bu jeryanda ularni biwasite atiraw oblasti turghunlirining bashqurghanliqini bildürgen.

Qazaqistanda diniy esebiylikning tarqiliwatqanliqini "Wrémya" gézitide bésilghan "Takfirlarning qanliq izi. Ili-alataw milliy parkidiki ammiwi qirghinchiliqning yéngi tepsilatliri" namliq maqalimu delilleydu. Uningda éytilishiche, mezkur parkta yüz bergen adem öltürüsh weqesining diniy esebiylik guruppiliri teripidin emelge ashurulghanliqini memliketning ichki ishlar ministirliqi étirap qilghan. Politsiye idarisi wekilliri yerlik ahalini mezkur adem öltürgüchilerning qorallan'ghanliqi we intayin xeterlikliki heqqide agahlandurghan bolup, térrorchilarning almata oblasti qarasay nahiyisining ta'usamali mehellisige orunlashqandin kéyin, u yerde yüz bergen partlashta bir qanche ayal kishi we balilarning qurban bolghanliqini, andin térrorchilarning ili-alataw parkigha kélip orunlashqanliqini xewerligen. Melumatlargha qarighanda, ular mezkur rayonda 12 ademni öltürgendin kéyin politsiye ularning izigha chüshüp, ular makanlighan jayni qorshap hujum qilghan. Netijide 13 térrorchi ujuqturulghan, bir mexsus etret jengchisi bolsa yarilan'ghan. Hazir bu ishqa alaqisi bar yene ikki kishi izdeshtürülmekte iken. Maqalide éytilishiche, analizchilar mezkur térrorchilarning mexsus teyyarliqtin ötmigenlikini, herbiy teyyarliqning adettiki qa'idilirini bilmigenliktin partlighuch maddilarni teyyarlash mezgilide tuyuqsiz partlash yüz bérip, bir nechche kishining ölümige seweb bolghanliqini ilgiri sürgen.

Maqalide shundaqla memlikettiki térrorluq heriketlirige munasiwetlik öz waqtida chariler qollanmighanliqtin, axirqi bir yil ichidila yüzdin oshuq jinayet yüz bergenliki hem ularning térrorchiliq bilen alaqisi barliqi iqrar qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet