Қазақистан уйғур җамаәтчилики атақлиқ уйғуршунас алим шерипахун баратоф билән хошлашти

2012-Йилниң 17-декабирда алматада көрнәклик уйғуршунас алим филологийә пәнлириниң намзати, педагог вә устаз шерипахун баратоф 77 йешида аләмдин өтти.
Ихтиярий мухбиримиз ойған
2012-12-18
Share
sheripaxun-baratof-305.jpg (Солдин) һәсәнҗан ахмадуллайеф, шерипахун баратоф, зерип молотоф.
RFA/Oyghan

18-Декабирда алмата вә униң әтрапидин кәлгән көп сандики юрт-җамаәтчилик алимни ахирқи сәпәргә узатти. Дәпнә мурасимида сөзгә чиққан зиялийлар, җәмийәтлик бирләшмиләр вәкиллири, юрт актиплири вә башқилар мәрһумниң қазақистан, шу җүмлидин уйғуршунаслиқ пенигә, миллий маарип вә мәдәнийитигә, җәмийәтлик ишларға қошқан төһписини, униң инсаний пәзиләтлирини алаһидә тәкитлиди.

Шерипахун абдуҗелил оғли баратоф 1935-йили алмата вилайитиниң челәк наһийисигә қарашлиқ қариторуқ йезисида деһқан аилисидә дуняға кәлгән. Дәсләп өз юртидики башланғуч мәктәптә, андин наһийә мәркизи челәк йезисида билим алған. Дадиси абдуҗелил улуғ вәтән урушиға атлинип, җәң мәйданида қаза болғандин кейин, аниси зәйнәп үч бала билән қалған. Ш.Баратоф 1956-йили яркәнт педагогика мәктипини тамамлап, шу йили алматадики абай намидики қазақ педагогика институтиниң уйғур бөлүмигә оқушқа чүшиду. Уни 1961-йили түгәткәндин кейин юрти қариторуқта икки йил муәллимлик қилған. У кичикидин илим билән шуғуллинишни арзу қилған. У 1963-йили қазақистан пәнләр академийиси уйғуршунаслиқ бөлүминиң аспиратурисиға оқушқа киргән. Уни тамамлап уйғуршунаслиқ бөлүмидә, андин уйғуршунаслиқ институтида, 1996-йили институт йепилғандин кейин, та 2005-йилғичә уйғуршунаслиқ мәркизидә тилшунаслиқ бойичә илмий лайиһиләргә қатнашқан. У көплигән илмий әмгәкләрниң апторидур.

Ш. Баратоф узақ вақит мабәйнидә, уйғур мәктәплири үчүн оқуш қораллирини тәйярлашқа актип қатнашқан. У уйғур тили пени бойичә йигирмидин ошуқ дәрслик вә қолланмиларниң аптори. Кейинки йилларда униң мақалилири "уйғур авази" вә "асия бүгүн" гезитлиридә үзлүксиз бесилип турди. Алим мақалилиридә уйғурларниң өрп-адәтлири, маарипи, мәдәнийити, турмуш-тирикчилики вә башқиму мәсилиләр һәққидә бай мәлуматларни бәргән. У кейинки вақитларда "уйғур авази" гезити йенидики аталғушунаслиқ кеңишини башқурған.

Ш. Баратофниң юрт-җамаәтчилик ишлириға паал арилашқанлиқиму яхши мәлумдур. У узақ вақит алмата шәһири әвезоф наһийилик уйғур мәдәнийәт мәркизиниң муавин рәиси, шундақла рәиси вәзипилириниму атқурған.

Радиомиз зияритини қобул қилған пешқәдәм зиялийлардин өктәбир җамалидиноф вә зерип молотофлар мәрһум шерипахун баратофни әсләп өз тәсиратлирини баян қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт