Qazaqistan Uyghur jama'etchiliki ataqliq Uyghurshunas alim shéripaxun baratof bilen xoshlashti

18-Dékabirda almata we uning etrapidin kelgen köp sandiki yurt-jama'etchilik alimni axirqi seperge uzatti. Depne murasimida sözge chiqqan ziyaliylar, jem'iyetlik birleshmiler wekilliri, yurt aktipliri we bashqilar merhumning qazaqistan, shu jümlidin Uyghurshunasliq pénige, milliy ma'arip we medeniyitige, jem'iyetlik ishlargha qoshqan töhpisini, uning insaniy peziletlirini alahide tekitlidi.

Shéripaxun abdujélil oghli baratof 1935-yili almata wilayitining chélek nahiyisige qarashliq qaritoruq yézisida déhqan a'iliside dunyagha kelgen. Deslep öz yurtidiki bashlan'ghuch mektepte, andin nahiye merkizi chélek yézisida bilim alghan. Dadisi abdujélil ulugh weten urushigha atlinip, jeng meydanida qaza bolghandin kéyin, anisi zeynep üch bala bilen qalghan. Sh.Baratof 1956-yili yarkent pédagogika mektipini tamamlap, shu yili almatadiki abay namidiki qazaq pédagogika institutining Uyghur bölümige oqushqa chüshidu. Uni 1961-yili tügetkendin kéyin yurti qaritoruqta ikki yil mu'ellimlik qilghan. U kichikidin ilim bilen shughullinishni arzu qilghan. U 1963-yili qazaqistan penler akadémiyisi Uyghurshunasliq bölümining aspiraturisigha oqushqa kirgen. Uni tamamlap Uyghurshunasliq bölümide, andin Uyghurshunasliq institutida, 1996-yili institut yépilghandin kéyin, ta 2005-yilghiche Uyghurshunasliq merkizide tilshunasliq boyiche ilmiy layihilerge qatnashqan. U köpligen ilmiy emgeklerning aptoridur.

Sh. Baratof uzaq waqit mabeynide, Uyghur mektepliri üchün oqush qorallirini teyyarlashqa aktip qatnashqan. U Uyghur tili péni boyiche yigirmidin oshuq derslik we qollanmilarning aptori. Kéyinki yillarda uning maqaliliri "Uyghur awazi" we "Asiya bügün" gézitliride üzlüksiz bésilip turdi. Alim maqaliliride Uyghurlarning örp-adetliri, ma'aripi, medeniyiti, turmush-tirikchiliki we bashqimu mesililer heqqide bay melumatlarni bergen. U kéyinki waqitlarda "Uyghur awazi" géziti yénidiki atalghushunasliq kéngishini bashqurghan.

Sh. Baratofning yurt-jama'etchilik ishlirigha pa'al arilashqanliqimu yaxshi melumdur. U uzaq waqit almata shehiri ewézof nahiyilik Uyghur medeniyet merkizining mu'awin re'isi, shundaqla re'isi wezipilirinimu atqurghan.

Radi'omiz ziyaritini qobul qilghan péshqedem ziyaliylardin öktebir jamalidinof we zérip molotoflar merhum shéripaxun baratofni eslep öz tesiratlirini bayan qildi.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar