"11-Séntebir weqesi" xatiriside qurbanlar yene bir qétim eslendi

Muxbirimiz eziz
2019-09-11
Share

Buningdin 18 yil ilgiri, yeni 2001-yili 11-séntebir küni yüz bergen "11-Séntebir weqesi" insaniyetning hazirqi zaman tarixidiki zor weqelerning biri hésablinidu. Shu küni amérikaning nyu-york shehiridiki dunya soda merkizining qoshmaq binasi térrorchilarning ayropilan hujumida gümürülüp chüshkendin kéyin dunyawi miqyasta "Térrorluqqa qarshi dunyawi birliksep" hasil bolushqa bashlighan idi.

Bu yilqi "11-Séntebir weqesi" xatiriside amérika prézidénti donald tramp we amérika tashqi ishlar ministiri mayk pompéyo ijtima'iy taratqularda bayanat élan qilip, bu künning térrorluqqa qarshi dunyawi küreshning bashlinish nuqtisi bolup qalghanliqini alahide tekitlidi. Shuningdek birdek "Biz bu künni menggü untumaymiz" dédi. 11-Séntebir küni chüshtin burun besh burjeklik binada ötküzülgen xatirilesh pa'aliyitide donald tramp "11-Séntebir weqesining qurbanliri menggü yadimizda" dédi.

Bu kün harpisida washin'gton shehiridiki Uyghur kishilik hoquq qurulushi teshkilatimu mexsus bayanat élan qilip, özlirining 11-séntebir qurbanlirini yad étidighanliqini bildürdi. Shuningdek ene shu qétimliq weqedin kéyin bashlan'ghan "Térrorluqqa qarshi dunyawi küresh" dolqunida xitay hökümitining "Térrorluqqa qarshi turush" ni suyi'istémal qilip Uyghurlarni basturushni kücheytkenlikini, nöwette bolsa "Térrorluqning aldini élish" bahaniside üch milyonche Uyghurni lagérlargha qamiwalghanliqini yene bir qétim tekitlidi.

Bayanatta ular xelq'ara jama'etni térrorluqqa qarshi turush bilen xitay hökümitining "Térrorluq" ni suyi'istémal qilip Uyghurlarni nishan qilghan halda "Qattiq zerbe bérish" herikitini dawam qildurushi otturisidiki roshen perqni tonup yétishke chaqirdi. Shundaqla Uyghurlarning emeliyette "11-Séntebir weqesi" ning eng chong qurbanlirining biri ikenlikini, shu sewebtin térrorluqning qurbanlirini yad étish bilen birge özlirining milliy kimlikini saqlap qélish üchün tirishiwatqan tinch ahalining hujum nishani bolup qélishigha xelq'ara jama'etning yardem qilishi lazimliqini tekitlidi. Bu jehettiki konkrét yardem türlirining biri qatarida amérika dölet mejliside muzakire qiliniwatqan Uyghurlargha da'ir qanun layihilirige imza qoyushni tézlitish üchün amérika puqraliridin awam we kéngesh palata ezalirigha téléfon qilish yaki ulargha xet yézish telep qilindi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet