Рабийә қадир ханим малайшия муавин баш министириға қарита очуқ хәт елан қилди

Мухбиримиз шөһрәт һошур
2018-02-21
Share

Дуня уйғур қурултийиниң алий рәһбири рабийә қадир ханим тайланд түрмисидин қачқан вә малайшияда тутуп турулуватқан 11 уйғур мәсилисидә малайшия муавин баш министири әхмәт заһидқа очуқ мәктуп язған.

Очуқ хәттә әхмәт заһидниң өткән һәптә қилған 11 уйғурниң террорлуқ тәшкилатлири билән алақиси бар-йоқлуқи тәкшүрүлүватқанлиқиға аит сөзлири тилға елинип, әгәр хитайниң көрсәтмиси бойичә иш тутулса, һәрқандақ бир уйғурни террорчи дәп қарашқа тоғра келидиғанлиқи, тинчлиқ йоли билән мәсилә оттуриға қойған профессор илһам тохтиниңму муддәтсиз кесилгәнлики әскәртилгән. Баянатта йәнә нөвәттә уйғурларниң өз инсаний һәқ-һоқуқлирини тәләп қилишила әмәс, бәлки тирикчилик қилишиниңму, җенини сақлаш үчүн чеградин қечишиниңму "террорлуқ" дәп қариливатқанлиқи вә бу вәзийәтниң мәзкур 11 уйғур мәсилисидиму айдиңлашқанлиқи әскәртилгән.

Илгири камбоджа вә тайландтин қайтурулған уйғурларниң еғир җазаланғанлиқи вә бир қисминиң из-дерәксизлики әскәртилгән баянатта, малайшия һөкүмитиниң мәсилигә қарар бериштә бу 11 уйғурниң һаяти бихәтәрлики вә улар сәвәблик палакәтчиликкә йолуқидиған уларниң аилә-тавабиат һәм дост-бурадәрлириниң ақивитини җиддий ойлишишқа дәвәт қилинған.

Рабийә қадир ханим баянатида хитайниң бу мәсилидә малайшияға һәрхил мәнпәәтләр һәққидә вәдә беридиғанлиқи, әмма малайшия хәлқиниң 11 уйғурниң һаятий бихәтәрлики бәдилигә кәлгән бундақ мәнпәәтни қобул қилмайдиғанлиқиға ишинидиғанлиқини әскәрткән. У, малайшия һөкүмитини малайшия хәлқиниң ирадиси вә шан-шәрипигә уйғун қарар беришкә, залимға боюн әгмәслик вә зулумға шерик болмаслиққа дәвәт қилған.

Мәлум болушичә, рабийә қадир ханим мәзкур очуқ хетини дүшәнбә күни малайшия муавин баш министириға йоллиған вә бүгүн хәлқаралиқ уйғур кишилик һоқуқ вә демократийәни илгири сүрүш җәмийитиниң тор бетидә елан қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт