Rabiye qadir xanim malayshiya mu'awin bash ministirigha qarita ochuq xet élan qildi

Muxbirimiz shöhret hoshur
2018.02.21

Dunya Uyghur qurultiyining aliy rehbiri rabiye qadir xanim tayland türmisidin qachqan we malayshiyada tutup turuluwatqan 11 Uyghur mesiliside malayshiya mu'awin bash ministiri exmet zahidqa ochuq mektup yazghan.

Ochuq xette exmet zahidning ötken hepte qilghan 11 Uyghurning térrorluq teshkilatliri bilen alaqisi bar-yoqluqi tekshürülüwatqanliqigha a'it sözliri tilgha élinip, eger xitayning körsetmisi boyiche ish tutulsa, herqandaq bir Uyghurni térrorchi dep qarashqa toghra kélidighanliqi, tinchliq yoli bilen mesile otturigha qoyghan proféssor ilham toxtiningmu muddetsiz késilgenliki eskertilgen. Bayanatta yene nöwette Uyghurlarning öz insaniy heq-hoquqlirini telep qilishila emes, belki tirikchilik qilishiningmu, jénini saqlash üchün chégradin qéchishiningmu “Térrorluq” dep qariliwatqanliqi we bu weziyetning mezkur 11 Uyghur mesilisidimu aydinglashqanliqi eskertilgen.

Ilgiri kambodzha we taylandtin qayturulghan Uyghurlarning éghir jazalan'ghanliqi we bir qismining iz-déreksizliki eskertilgen bayanatta, malayshiya hökümitining mesilige qarar bérishte bu 11 Uyghurning hayati bixeterliki we ular seweblik palaketchilikke yoluqidighan ularning a'ile-tawabi'at hem dost-buraderlirining aqiwitini jiddiy oylishishqa dewet qilin'ghan.

Rabiye qadir xanim bayanatida xitayning bu mesilide malayshiyagha herxil menpe'etler heqqide wede béridighanliqi, emma malayshiya xelqining 11 Uyghurning hayatiy bixeterliki bedilige kelgen bundaq menpe'etni qobul qilmaydighanliqigha ishinidighanliqini eskertken. U, malayshiya hökümitini malayshiya xelqining iradisi we shan-sheripige uyghun qarar bérishke, zalimgha boyun egmeslik we zulumgha shérik bolmasliqqa dewet qilghan.

Melum bolushiche, rabiye qadir xanim mezkur ochuq xétini düshenbe küni malayshiya mu'awin bash ministirigha yollighan we bügün xelq'araliq Uyghur kishilik hoquq we démokratiyeni ilgiri sürüsh jem'iyitining tor bétide élan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.