Malayshiyadiki 11 Uyghurning soti 24‏-aprélgha kéchiktürülgen

Muxbirimiz shöhret hoshur
2018.03.21

Malaysiya axbaratining xewer qilishiche, ötken yili tayland türmisidin qachqan we bu yil féwralda malayshiyada tutulghan 11 neper Uyghur bügün, yeni 21‏-mart küni sotqa tartilghan, emma türkche terjiman bolmighanliqi üchün sotlash dawam qilalmighan we sot waqti 24-aprélgha kéchiktürülgen.

Bu 11 Uyghurning adukati fexmi mo'in bügün muxbirlargha qilghan sözide ularning “Malaysiya köchmenler qanunigha xilapliq qilish, yeni malayshiyagha ruxsetsiz kirish” bilen eyiblinish éhtimalliqini bayan qilghan. Emma u malaysiya da'irilirining bu Uyghurlarni xitaygha qayturuwétish we qayturmasliq mesiliside hazirche bir néme déyelmeydighanliqini eskertken.

Xelq'ara xewerlerde déyilishiche, 11 Uyghur tutulghandin kéyin xitay da'iriliri malayshiyadin ularni qayturup bérishni telep qilghan. Amérika qatarliq bir qisim gherb döletliri malayshiyani bu 11 Uyghurni xitaygha qayturmasliqqa chaqirghan. Amérika bashliq gherb elliri, eger bu Uyghurlar xitaygha qayturulsa hayatiy bixeterlikining xewpke uchraydighanliqini tilgha élip, özlirining bu jehettiki endishisini ipadiligen idi.

Bu 11 Uyghur 4 yilning aldida taylandta tutulup qalghan Uyghurlarning bir qismi idi. Eyni waqitta taylandta tutulup qélip özlirining türkiye wetendishi ikenlikini ilgiri sürgen 200 che Uyghurning bir qismi 2015‏-yili xitaygha qayturulghan, bir qismi türkiyege yötkelgen. Taylandta qépqalghanliridin 20 nepiri ötken yilning axiri türme témini téship we yotqan-edyallirini arqan qilip türmidin qéchip chiqqan idi.

Bügünki bu heqtiki xewerlerde türmidin qéchip malayshiyada tutulup qalghan zekeriya arman qatarliq bu 11 neper Uyghur yashning 20 yash bilen 40 yash arisida ikenliki qeyt qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.