Б д т дики 22 дөләт хитайниң кишилик һоқуқ дәпсәндичиликигә қарита бирләшмә баянат елан қилди

Мухбиримиз сада
2019-07-10
Елхәт
Пикир
Share
Принт

Б д т ниң кишилик һоқуқ кеңиши қармиқидики 22 әза дөләт 10-июл бирләшмә баянат елан қилип, хитай һөкүмитини уйғур дияридики уйғурларни нишан қилған зор көләмлик тутқун вә зиянкәшлик қилмишлирини дәрһал тохтитишқа чақирди.

Кишилик һоқуқни көзитиш тәшкилатиниң 10-июл күни елан қилған хәвиригә қариғанда, бу 22 дөләт австралийә, австрийә, белгийә, канада, данийә, естонийә, финландийә, фирансийә, германийә, исландийә, иреландийә, японийә, латвийә, литва, лиюксембург, голландийә, йеңи зеландийә, норвегийә, испанийә, шиветсийә, шивейитсарийә вә әнглийә қатарлиқларни өз ичигә алидикән. Һалбуки буниңда бирму ислам дөлити йоқ икән.

Хәвәрдин мәлум болушичә, 22 дөләтниң бирдәк баянат елан қилиши б д т да илгири көрүлүп бақмиған әһвал икән. Баянатта бу 22 дөләт хитай һөкүмитигә б д т кишилик һоқуқ алий комиссари мишел бәшлет вә б д т дики башқа мутәхәссисләр билән һәмкарлишип, уларниң уйғур диярини чәклимисиз зиярәт қилиши үчүн шараит яритип бериши керәклики һәққидиму чақириқ қилған.

Хәвәрдә илгири сүрүлүшичә, кишилик һоқуқни көзитиш тәшкилатиниң җәнвәдә турушлуқ директори җон фишир мәзкур баянат һәққидә сөз қилип: «22 дөләт елан қилған бу бирләшмә баянат пәқәт шинҗаңдики уйғурлар үчүнла муһим болуп қалмастин, бәлки дуняниң һәрқайси җайлиридики б д т ниң әң алий һоқуқ органлириға тайинип дөләт башқуруватқан кишиләр үчүнму бәк муһимдур» дегән.

Хәвәрдин мәлум болушичә, хитайниң уйғур дияридики еғир бастурушиға қарита 2016-йили марттиму бир бирләшмә баянат елан қилинған болуп, буниңға америка башчилиқидики 12 дөләт имза қойған икән. Бу қетимлиқ баянатқа имза қойған дөләтниң сани илгирикидин икки һәссиләнгән.

Мутәхәссисләр бу һәқтә анализ йүргүзүп, ғәрб әллириниң йәнила уйғур мәсилисидә авангарт орунда туруватқанлиқини ейтип, ислам әллириниң бу мәсилигә қарита һазирғичә аваз чиқармиғанлиқини әйибләшмәктә.

Пикирләр (0)
Share
Толуқ бәт