B d t diki 22 dölet xitayning kishilik hoquq depsendichilikige qarita birleshme bayanat élan qildi

Muxbirimiz sada
2019-07-10
Élxet
Pikir
Share
Print

B d t ning kishilik hoquq kéngishi qarmiqidiki 22 eza dölet 10-iyul birleshme bayanat élan qilip, xitay hökümitini Uyghur diyaridiki Uyghurlarni nishan qilghan zor kölemlik tutqun we ziyankeshlik qilmishlirini derhal toxtitishqa chaqirdi.

Kishilik hoquqni közitish teshkilatining 10-iyul küni élan qilghan xewirige qarighanda, bu 22 dölet awstraliye, awstriye, bélgiye, kanada, daniye, éstoniye, finlandiye, firansiye, gérmaniye, islandiye, irélandiye, yaponiye, latwiye, litwa, liyuksémburg, gollandiye, yéngi zélandiye, norwégiye, ispaniye, shiwétsiye, shiwéyitsariye we en'gliye qatarliqlarni öz ichige alidiken. Halbuki buningda birmu islam döliti yoq iken.

Xewerdin melum bolushiche, 22 döletning birdek bayanat élan qilishi b d t da ilgiri körülüp baqmighan ehwal iken. Bayanatta bu 22 dölet xitay hökümitige b d t kishilik hoquq aliy komissari mishél beshlét we b d t diki bashqa mutexessisler bilen hemkarliship, ularning Uyghur diyarini cheklimisiz ziyaret qilishi üchün shara'it yaritip bérishi kérekliki heqqidimu chaqiriq qilghan.

Xewerde ilgiri sürülüshiche, kishilik hoquqni közitish teshkilatining jenwede turushluq diréktori jon fishir mezkur bayanat heqqide söz qilip: "22 Dölet élan qilghan bu birleshme bayanat peqet shinjangdiki Uyghurlar üchünla muhim bolup qalmastin, belki dunyaning herqaysi jayliridiki b d t ning eng aliy hoquq organlirigha tayinip dölet bashquruwatqan kishiler üchünmu bek muhimdur" dégen.

Xewerdin melum bolushiche, xitayning Uyghur diyaridiki éghir basturushigha qarita 2016-yili marttimu bir birleshme bayanat élan qilin'ghan bolup, buninggha amérika bashchiliqidiki 12 dölet imza qoyghan iken. Bu qétimliq bayanatqa imza qoyghan döletning sani ilgirikidin ikki hessilen'gen.

Mutexessisler bu heqte analiz yürgüzüp, gherb ellirining yenila Uyghur mesiliside awan'gart orunda turuwatqanliqini éytip, islam ellirining bu mesilige qarita hazirghiche awaz chiqarmighanliqini eyibleshmekte.

Toluq bet