Uyghur élige sayahetke kelgenler 30 milyon adem qétimgha yetken

Xitay hökümitining teshkillishi bilen bu yilning 1-peslide Uyghur élige sayahetke kelgen xitaylarning sani 30 milyon adem qétimgha yetken. Bu, siyasiy xaraktérlik “Qizil sayahet” bolup, mexsus tesis qilin'ghan “Qizi sayahet nuqtiliri” arqiliq ulargha “Wetenperwerlik terbiyesi” élip bérilghan. Xitay taratqulirining ashkarilishiche, hökümet sayahetchilerni qoshumche yardem puli bilen teminleydighan bu teshkillik sayahet türi siyasiy gherezlik bolup, uning meqsiti xitay sayahetchiliride “Shinjangning weziyitining normal”, “Shinjang ezeldin tartip xitay zémini” dégen angni shekillendürüsh iken.

Melum bolushiche, bu yilning 1-peslide sayahetchilerning sani ötken yilning oxshash mezgilidikidin 14.56 Pirsent ashqan. Xitay taratqulirida sayahet kirimining 22 milyard 768 milyon yüendin ashqanliqi ilgiri sürülgen. “Shinjang géziti” ning bu heqtiki xewiride étilishiche, rayondiki 100 din artuq atalmish “Qizil menzirilik sayahet rayoni” sayahetchilerning nuqtiliq sayahet menzilgahliri iken.

Lékin, analizchilarning bildürüshiche, Uyghur iligha qaratqan bu teshkillik siyasiy sayahet herikiti iqtisadiy, siyasiy, medeniyet, tarix jehetlerdiki köp qirliq meqsetni ishqa ashurushni nishan qilghan bolup, emeliyette bu Uyghurlargha qaritilghan “Irqiy qirghinchiliq” siyasitining bir parchisi iken. Analizchilar, bu heriketning hem iqtisadi kirimni, hem xitay puqralirigha “Shinjang weziyiti normal”, “Bu yerde irqiy qirghinchiliq yoq”,” Uyghurlar bextiyar yashawatidu” dégen signallarni bérishni hem ularning “Shinjang tarixi we medeniyiti” ge bolghan chüshenchisini burmilashni meqset qilghanliqini ilgiri sürmekte.