Уйғур инсан һәқлири қурулуши тәшкилати “тйәнәнмен вәқәси” мунасивити билән баянат елан қилди

Америка пайтәхти вашингтон шәһиридики уйғур инсан һәқлири қурулуши тәшкилати 31-май күни баянат елан қилип 1989-йили 4-июн күни йүз бәргән “тйәнәнмен вәқәси” дә һаятидин айрилғанларниң аилә тавабиатлириға өз һесдашлиқини билдүрди, шундақла хитай һөкүмитидин мәзкур вәқәниң тәпсилатини ашкарилашни вә бу вәқәгә мәсул болған һөкүмәт хадимлириға тегишлик җаза беришни тәләп қилди.

Мәзкур баянатта хитай һөкүмитиниң “тйәнәнмен қирғинчилиқи” дин савақ елиш орниға йеңидин бир йүрүш қанун-низамларни, җүмлидин “террорлуққа қарши туруш қануни”, “дөләт бихәтәрлик қануни” қатарлиқларни елан қилип, пуқраларниң әркинликини боғуп келиватқанлиқи тәнқидләнди.

Уйғур инсан һәқлири қурулуши тәшкилатиниң директори алим сейитоф 1989-йили 4-июн күни хитай хәлқ азадлиқ армийисиниң оқида өлгән шәхсләрни унтумаслиқни тәкитләп, “ши җинпиң һакимийити охшаш шәкилдә диктатора қануни арқилиқ әң әқәллий инсан һәқлирини дәпсәндә қилип келиватиду. Униң мәқсити хитай хәлқигә хизмәт қилиш әмәс, әксичә компартийәни, өзини вә өз һәқәмсайилириниң һоқуқини сақлап қелиш” дәп көрсәтти.

1989-Йилидики “тйәнәнмен вәқәси” дә өркәш дөләт бейҗиңдики демократчи оқуғучиларниң рәһбәрлиридин бири болуп ишлигән һәмдә шу вақиттики хитай баш министири ли пең билән болған йүзму-йүз сөһбәттә өзиниң җасарити вә қорқумсизлиқи сәвәблик хитай хәлқи арисида йүксәк һөрмәт қазанған иди.