Uyghur insan heqliri qurulushi teshkilati “Tyen'enmén weqesi” munasiwiti bilen bayanat élan qildi

Amérika paytexti washin'gton shehiridiki Uyghur insan heqliri qurulushi teshkilati 31-may küni bayanat élan qilip 1989-yili 4-iyun küni yüz bergen “Tyen'enmén weqesi” de hayatidin ayrilghanlarning a'ile tawabi'atlirigha öz hésdashliqini bildürdi, shundaqla xitay hökümitidin mezkur weqening tepsilatini ashkarilashni we bu weqege mes'ul bolghan hökümet xadimlirigha tégishlik jaza bérishni telep qildi.

Mezkur bayanatta xitay hökümitining “Tyen'enmén qirghinchiliqi” din sawaq élish ornigha yéngidin bir yürüsh qanun-nizamlarni, jümlidin “Térrorluqqa qarshi turush qanuni”, “Dölet bixeterlik qanuni” qatarliqlarni élan qilip, puqralarning erkinlikini boghup kéliwatqanliqi tenqidlendi.

Uyghur insan heqliri qurulushi teshkilatining diréktori alim séyitof 1989-yili 4-iyun küni xitay xelq azadliq armiyisining oqida ölgen shexslerni untumasliqni tekitlep, “Shi jinping hakimiyiti oxshash shekilde diktatora qanuni arqiliq eng eqelliy insan heqlirini depsende qilip kéliwatidu. Uning meqsiti xitay xelqige xizmet qilish emes, eksiche kompartiyeni, özini we öz heqemsayilirining hoquqini saqlap qélish” dep körsetti.

1989-Yilidiki “Tyen'enmén weqesi” de örkesh dölet béyjingdiki démokratchi oqughuchilarning rehberliridin biri bolup ishligen hemde shu waqittiki xitay bash ministiri li péng bilen bolghan yüzmu-yüz söhbette özining jasariti we qorqumsizliqi seweblik xitay xelqi arisida yüksek hörmet qazan'ghan idi.