Тйәнәнмен вәқәсигә четилип қолға елинған ахирқи мәһбус шәнбә күни қоюп берилиду

Мухбиримиз әркин
2016.10.14
Share on WhatsApp
Share on WhatsApp

1989‏-Йили йүз бәргән тйәнәнмен вәқәсигә қатнишип қолға елинған ахирқи сиясий мәһбус шәнбә күни қоюп берилидикән.

Мәркизи америкиниң санфрансеско шәһиридики “деалог” намлиқ кишилик һоқуқ фонди җәмийити, тйәнәнмен вәқәсидә муддәтсиз қамақ җазасиға һөкүм қилинип, кейинрәк қамақ җазаси қисқартилған мяв дешүнниң вақти шәнбә күни тошидиғанлиқини вә униң 27 йилдин кейин қоюп берилидиғанлиқини билдүрди.

Лекин “деалог” фонди җәмийитиниң қәйт қилишичә, мяв дешүн қоюп берилсиму, әмма у җисманий вә роһи кесәлгә гириптар болған. Мяв дешүн бурун бейҗиңдики мәлум бир завутниң ишчиси болуп, у 89- йилдики демократийә һәрикитидә йетәкчилик рол ойниған шәхс әмәс.

Әмма, хитай һөкүмити 1989‏-йили 4‏-июн кечисидики бастурушта бир севәткә от қоюп, көйүватқан танкиға атқан мяв дешүнни от қоюш җинайити билән әйибләп, өлүм җазасиға һөкүм қилған. 1991‏- Йили өлүм җазасини муддәтсиз қамақ җазасиға өзгәрткән иди. Бу йил 51 яшлиқ мяв дешүн һаятиниң йеримидин көп вақтини түрмидә өткүзгән һәм ташқи дуня билән алақиси узун йил үзүп ташланған.

Мяв дешүнниң камирдашлириниң бирләшмә агентлиқиға билдүрүшичә, мяв дешүн униңға артилған “җинайәтни қобул қилиш, әмгәккә қатнишиш, төвинамиға қол қоюш, қайта -тәрбийә”ләрни изчил рәт қилип кәлгән. Униң камирдеши ву венҗйән бирләшмә агентлириға қилған сөзидә, “униң һаят қелиши бир мөҗизә” дегән.

Америка һөкүмити һәр йили 4‏-июн һарписида баянат елан қилип, хитай һөкүмитини “тйәнәнмен вәқәси” дә сотланған сиясий мәһбусларни қоюп беришкә чақирип кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.