Tyen'enmén weqesige chétilip qolgha élin'ghan axirqi mehbus shenbe küni qoyup bérilidu

Muxbirimiz erkin
2016.10.14
Share on WhatsApp
Share on WhatsApp

1989‏-Yili yüz bergen tyen'enmén weqesige qatniship qolgha élin'ghan axirqi siyasiy mehbus shenbe küni qoyup bérilidiken.

Merkizi amérikining sanfransésko shehiridiki “Dé'alog” namliq kishilik hoquq fondi jem'iyiti, tyen'enmén weqeside muddetsiz qamaq jazasigha höküm qilinip, kéyinrek qamaq jazasi qisqartilghan myaw déshünning waqti shenbe küni toshidighanliqini we uning 27 yildin kéyin qoyup bérilidighanliqini bildürdi.

Lékin “Dé'alog” fondi jem'iyitining qeyt qilishiche, myaw déshün qoyup bérilsimu, emma u jismaniy we rohi késelge giriptar bolghan. Myaw déshün burun béyjingdiki melum bir zawutning ishchisi bolup, u 89- yildiki démokratiye herikitide yétekchilik rol oynighan shexs emes.

Emma, xitay hökümiti 1989‏-yili 4‏-iyun kéchisidiki basturushta bir séwetke ot qoyup, köyüwatqan tankigha atqan myaw déshünni ot qoyush jinayiti bilen eyiblep, ölüm jazasigha höküm qilghan. 1991‏- Yili ölüm jazasini muddetsiz qamaq jazasigha özgertken idi. Bu yil 51 yashliq myaw déshün hayatining yérimidin köp waqtini türmide ötküzgen hem tashqi dunya bilen alaqisi uzun yil üzüp tashlan'ghan.

Myaw déshünning kamirdashlirining birleshme agéntliqigha bildürüshiche, myaw déshün uninggha artilghan “Jinayetni qobul qilish, emgekke qatnishish, töwinamigha qol qoyush, qayta -terbiye”lerni izchil ret qilip kelgen. Uning kamirdéshi wu wénjyen birleshme agéntlirigha qilghan sözide, “Uning hayat qélishi bir möjize” dégen.

Amérika hökümiti her yili 4‏-iyun harpisida bayanat élan qilip, xitay hökümitini “Tyen'enmén weqesi” de sotlan'ghan siyasiy mehbuslarni qoyup bérishke chaqirip kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.