Uyghur kishilik hoquq programmisi guruppisi xelq'ara jama'etni 5 - féwral ghulja weqesini qayta bir esleshke chaqirdi

Muxbirimiz shöhret hoshur
2016-02-03
Élxet
Pikir
Share
Print

Aldimizdiki 5 - fiwral küni 1997 - yili ghuljida yüz bergen 5 - féwral weqesining 19 yilliq xatire küni. Washin'gitonda xizmet qiliwatqan Uyghur kishilik hoquq programmisi guruppisi bügün bu munasiwet bilen bir bayanat élan qilip, xelq'ara jama'etni mezkur weqeni qayta bir esleshke deqet qildi. Bayanatta bu weqening bezi xitay teshwiqat matériyallirida Uyghurlar ichidiki térrorluq heriketlirining bashlinishi dep qeyt qilin'ghanliqi, emeliyette bolsa, buning tinch shekilde bashlan'ghan we xitayning dölet zorawanliqi seweblik qanliq axirlashqan bir ammiwiy namayish ikenliki eslitildi.

Ghulja yashlirining ene shu mezgilde jem'iyette yamrighan zeherlik chikimlikni cheklesh üchün meshrep pa'aliyetlirini kéngeytkenliki we bu meshreptin tehdit hés qilghan xitay da'irilirining meshrepte yéteklesh roli alghan diniy zatlarni tutqun qilghanliqi tilgha élin'ghan bayanatta, xitay mezkur namayishni basturushta qollan'ghan sotsiz étiwétish, xalighanche tutqun qilish we türmilerde qéyin - qistaqqa élishtek dölet zorawanliqini 2013 - yili xoten xan'ériq, 2014 - yili yeken élishqu we aqsuning alaqagha weqeliride qollan'ghanliqini tekitlendi. Mezkur guruppa bu bayanatida yene, xelq'ara jama'etni bu tür weqelerge insaniy mes'uliyetchanliq bilen pozitsiye bildürüsh arqiliq xitaygha insan heqliri mesiliside heddini bildürüshke chaqirdi.

Toluq bet