Уйғур елидә иҗтимаий алақә тори бихәтәрликигә мунасивәтлик йәнә 6 дело бир тәрәп қилинған

Мухбиримиз ирадә
2019-11-05
Елхәт
Пикир
Share
Принт

Тәңритағ ториниң 5-ноябир күни тарқатқан хәвиридин қариғанда, уйғур аптоном районлуқ алақә тори учури ишханиси вә җамаәт хәвпсизлики назарити «торда қанунға хилап учур тарқитиш» дегән җинайәт билән 24-түркүмдә йәнә алтә типик делони бир тәрәп қилған.

Хәвәрдә дело садир қилғучиларниң тор супилиридин пайдилинип, диний әсәбийлик, миллий бөлгүнчилик һәмдә сахта учур қатарлиқ мәзмунлардики язма, сүрәт, үн-синларни тәрғиб қилғанлиқи, сақлап тарқатқанлиқи илгири сүрүлгән. Бу 6 типик дело бойичә икки нәпәр уйғур, бир нәпәр қазақ вә 4 нәпәр хитай җазаланған. Атуш вә қәшқәр қағилиқ наһийәлиридин болған икки нәпәр уйғурниң яшлири айрим-айрим һалда 26 яш вә 33 яш болуп, уларниң һәр иккиси «алақә тори арқилиқ диний әсәбийлик идийәсини тәрғиб қилидиған үн һөҗҗитини чүшүргән вә аңлиған, дини әсәбийлик идийәси тәрғиб қилинған електронлуқ китабни чүшүргән» дегән җинайәт билән қариланған.

Хәвәрдә йәнә санҗи шәһиридин җаң фамилилик хитай кишиниң «үндидар топи арқилиқ аптоном районниң муқимлиқни қоғдаш сияситигә четилидиған питнә-иғва учури тарқитип, чатақ чиқиришқа қутритип, җәмийәт аммиви тәртипини қалаймиқанлаштурған» лиқи илгири сүрүлгән.

Тәңритағ ториниң юқиридики хәвиридә йәнә мунулар әскәртилгән: «алақә торида зораванлиққа, террорлуққа, миллий бөлгүнчиликкә, диний әсәбийликкә четилидиған һәмдә милләтләр иттипақлиқиға, дөләтниң бирликигә бузғунчилиқ қилидиған язма, сүрәт, үн-синларни тәрғиб қилған, сақлиған, тарқатқанлар; партлитиш қурулмиси, қорал-ярағ, тизгинлинидиған тиғлиқ әсвабларни ясашни, ишлитиш усули вә техника маһаритини өгәткәнләр һәмдә сахта учур тарқатқанларниң җавабкарлиқи қанун бойичә сүрүштүрүлиду».

Юқиридики хәвәр хитай һөкүмитиниң уйғур елидә юқири пән-техника ярдими арқилиқ мутләқ контролни ишқа ашуруватқанлиқи кишилик һоқуқ органлириниң тәнқидигә учраватқан мәзгилдә елан қилинди. Хитай һөкүмитиниң уйғур вә қазақ қатарлиқ йәрлик милләтләрни кәң көләмдә лагерға қамаштиму уларниң үндидар қатарлиқ тор-алақә васитилиридики йолланмилири вә телефон алақилири қатарлиқларни баһанә қилғанлиқи ашкариланғаниди.

Пикирләр (0)
Share
Толуқ бәт