Uyghur élide ijtima'iy alaqe tori bixeterlikige munasiwetlik yene 6 délo bir terep qilin'ghan

Muxbirimiz irade
2019-11-05
Élxet
Pikir
Share
Print

Tengritagh torining 5-noyabir küni tarqatqan xewiridin qarighanda, Uyghur aptonom rayonluq alaqe tori uchuri ishxanisi we jama'et xewpsizliki nazariti "Torda qanun'gha xilap uchur tarqitish" dégen jinayet bilen 24-türkümde yene alte tipik déloni bir terep qilghan.

Xewerde délo sadir qilghuchilarning tor supiliridin paydilinip, diniy esebiylik, milliy bölgünchilik hemde saxta uchur qatarliq mezmunlardiki yazma, süret, ün-sinlarni terghib qilghanliqi, saqlap tarqatqanliqi ilgiri sürülgen. Bu 6 tipik délo boyiche ikki neper Uyghur, bir neper qazaq we 4 neper xitay jazalan'ghan. Atush we qeshqer qaghiliq nahiyeliridin bolghan ikki neper Uyghurning yashliri ayrim-ayrim halda 26 yash we 33 yash bolup, ularning her ikkisi "Alaqe tori arqiliq diniy esebiylik idiyesini terghib qilidighan ün höjjitini chüshürgen we anglighan, dini esebiylik idiyesi terghib qilin'ghan éléktronluq kitabni chüshürgen" dégen jinayet bilen qarilan'ghan.

Xewerde yene sanji shehiridin jang famililik xitay kishining "Ündidar topi arqiliq aptonom rayonning muqimliqni qoghdash siyasitige chétilidighan pitne-ighwa uchuri tarqitip, chataq chiqirishqa qutritip, jem'iyet ammiwi tertipini qalaymiqanlashturghan" liqi ilgiri sürülgen.

Tengritagh torining yuqiridiki xewiride yene munular eskertilgen: "Alaqe torida zorawanliqqa, térrorluqqa, milliy bölgünchilikke, diniy esebiylikke chétilidighan hemde milletler ittipaqliqigha, döletning birlikige buzghunchiliq qilidighan yazma, süret, ün-sinlarni terghib qilghan, saqlighan, tarqatqanlar؛ partlitish qurulmisi, qoral-yaragh, tizginlinidighan tighliq eswablarni yasashni, ishlitish usuli we téxnika maharitini ögetkenler hemde saxta uchur tarqatqanlarning jawabkarliqi qanun boyiche sürüshtürülidu".

Yuqiridiki xewer xitay hökümitining Uyghur élide yuqiri pen-téxnika yardimi arqiliq mutleq kontrolni ishqa ashuruwatqanliqi kishilik hoquq organlirining tenqidige uchrawatqan mezgilde élan qilindi. Xitay hökümitining Uyghur we qazaq qatarliq yerlik milletlerni keng kölemde lagérgha qamashtimu ularning ündidar qatarliq tor-alaqe wasitiliridiki yollanmiliri we téléfon alaqiliri qatarliqlarni bahane qilghanliqi ashkarilan'ghanidi.

Toluq bet