Бүгүн "8-март хәлқара аяллар байрими" күнидә уйғур аяллириниң мәсилиси тәкитләнди

Мухбиримиз ирадә
2018-03-08
Share

Америкидики уйғур кишилик һоқуқ қурулуши 8-март күни "хәлқара аяллар байрими" күни мунасивити билән баянат елан қилип, уйғур аяллири дуч келиватқан еғир вәзийәт үстидә тохталди.

Мәзкур орган баянатида уйғур аяллириниң хитай һөкүмити районда йүргүзүватқан қаттиқ бесим вә чәклимә сияситиниң биваситә зиянкәшликигә учраватқанлиқини тәкитлигән. Баянатта буниң мисали сүпитидә "уйғур биз" торидики хизмәтлири үчүн түрмигә соланған атикәм рози, "бәшинчи июл вәқәси" дә өмүрлүк қамаққа елинған гүлмирә имин, ғайиб оғлиниң давасини қилип түрмигә соланған патигүл ғулам вә шундақла мисирда оқуп қайтип кәткәндин кейин 7 йиллиқ қамаққа һөкүм қилинған бузәйнәп қатарлиқларниң делолирини санап өткән. 

Бундин башқа дуня уйғур қурултийиниң алий рәһбири рабийә қадир ханим вә радийомиз мухбири гүлчеһрә қейюмларниң юртидики уруқ-туғқанлириниң вә башқа миңлиған уйғур аяллириниң нөвәттә хитайниң "йепиқ тәрбийиләш лагерлири" ға соланғанлиқи тилға елинған. Уйғур аяллириниң, җүмлидин пүткүл уйғур хәлқиниң еғир қисмаққа елинғанлиқи шәрһләнгән.

Уйғур кишилик һоқуқ қурулушиниң баянатида уйғур аяллиридики мәвҗут иҗтимаий тәңсизликләрдин башқа йәнә хитай һөкүмити уйғурларға йүргүзүватқан "миллий кәмситиш, дини бесим, пиланлиқ туғут сиясәтлириниңму биваситә қурбанлири" болуватқанлиқи билдүрүлгән. Баянатта хәлқара җамаәтни уйғур аяллириниң вәзийитигә көңүл бөлүшкә, хитай һөкүмитини өзи қол қойған алақидар хәлқаралиқ қанунларға әмәл қилип, бу сиясәтлирини әмәлдин қалдурушқа чақирған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт