Bügün "8-Mart xelq'ara ayallar bayrimi" künide Uyghur ayallirining mesilisi tekitlendi

Muxbirimiz irade
2018-03-08
Share

Amérikidiki Uyghur kishilik hoquq qurulushi 8-mart küni "Xelq'ara ayallar bayrimi" küni munasiwiti bilen bayanat élan qilip, Uyghur ayalliri duch kéliwatqan éghir weziyet üstide toxtaldi.

Mezkur organ bayanatida Uyghur ayallirining xitay hökümiti rayonda yürgüzüwatqan qattiq bésim we cheklime siyasitining biwasite ziyankeshlikige uchrawatqanliqini tekitligen. Bayanatta buning misali süpitide "Uyghur biz" toridiki xizmetliri üchün türmige solan'ghan atikem rozi, "Beshinchi iyul weqesi" de ömürlük qamaqqa élin'ghan gülmire imin, ghayib oghlining dawasini qilip türmige solan'ghan patigül ghulam we shundaqla misirda oqup qaytip ketkendin kéyin 7 yilliq qamaqqa höküm qilin'ghan buzeynep qatarliqlarning délolirini sanap ötken. 

Bundin bashqa dunya Uyghur qurultiyining aliy rehbiri rabiye qadir xanim we radiyomiz muxbiri gülchéhre qéyyumlarning yurtidiki uruq-tughqanlirining we bashqa minglighan Uyghur ayallirining nöwette xitayning "Yépiq terbiyilesh lagérliri" gha solan'ghanliqi tilgha élin'ghan. Uyghur ayallirining, jümlidin pütkül Uyghur xelqining éghir qismaqqa élin'ghanliqi sherhlen'gen.

Uyghur kishilik hoquq qurulushining bayanatida Uyghur ayalliridiki mewjut ijtima'iy tengsizliklerdin bashqa yene xitay hökümiti Uyghurlargha yürgüzüwatqan "Milliy kemsitish, dini bésim, pilanliq tughut siyasetliriningmu biwasite qurbanliri" boluwatqanliqi bildürülgen. Bayanatta xelq'ara jama'etni Uyghur ayallirining weziyitige köngül bölüshke, xitay hökümitini özi qol qoyghan alaqidar xelq'araliq qanunlargha emel qilip, bu siyasetlirini emeldin qaldurushqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet