Roytérs agéntliqi: "Shi jinping bir qétimliq nutqida 'sadaqet' sözini yette qétim tilgha aldi"

Muxbirimiz shöhret hoshur
2019-03-07
Share

Roytérs agéntliqining bügünki xewiride xitay dölet rehberlirining bu yilni intayin nazuk bir yil dep qarawatqanliqi we öz hakimiyitidin endishe qiliwatqanliqini ilgiri sürdi.

Xewerde déyilishiche, xitay da'iriliri bu yil ichide tyen'enmin oqughuchilar herikitining 30 yilliqi, dalay lamaning tibettin ayrilghanliqining 60 yilliqi, xitay xelq jumhuriyiti qurulghanliqining 70 yilliqi qatarliq chong xatire künler teng kelgechke xitayda kompartiye hakimiyitige xewp yétidighan birer weqening yüz bérip qélishidin qattiq endishe qilmaqtiken.

Xewerde eskertilishiche, shi jinping 1‏-mart küni merkizi partiye mektipide sözligen bir nutqida rehbiri kadirlarni xata idiyelerdin uzaq turush, qalaymiqanchiliqlargha qarita hoshyar bolushqa chaqirish bilen birlikte ularning partiyege bolghan "Sadaqiti" ning hemmini bésip chüshidighan birinchi derijilik ölchem ikenlikini alahide tekitligen. U shu qétimliq nutqida "Sadaqetmen bolush" dégen sözni yette qétim tekrarlighan.

Bu heqte roytérs agéntliqigha pikir bayan qilghan asiya iqtisad tetqiqat ornining mutexessisi dunkan innés xitayda nöwette asasi qatlamlarda partiyege boysunmasliq, iqtisadiy sewiyesi yaxshilan'ghanlar arisida siyasiy islahat telep qilish, dölet boyiche iqtisadiy yüksilishishte astilishish körülüsh qatarliq hadisiler yüz bériwatqanliqi we buning xitay da'iriliride endishe peyda qiliwatqanliqini ilgiri sürgen. Herqandaq bir diktator hakimiyetning aghdurulup kétish endishisi ichide yashaydighanliqini eskertken mezkur mutexessis hemmini kontrol astigha élish arzusining xitay kompartiyesi hakimiyet béshigha kelgendin buyan mewjutluqini eskertken.

Shinxu'a agéntliqi yekshenbe künidiki in'glizche bir obzorida xitayning gherbche démokratiyeni 100 yil burun bilgenliki, emma uning xitayda ishqa ashmaydighanliqini uzun ötmey tonup yetkenliki, shunga xitayning özining siyasiy endizisidin chetnimeydighanliqi ilgiri sürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet