Xitay hökümiti lagérlarni aqlash üchün yene bir nöwetlik teshwiqat herikiti qozghighanliqi melum

Muxbirimiz irade
2019-08-01
Élxet
Pikir
Share
Print

Xitay hökümitining Uyghur élide qurghan lagérlirini xelq'arada aqlash üchün yene bir qétimliq omumyüzlük heriket qozghighanliqi melum bolmaqta.

1-Awghust küni xitayning "Shinxu'a tori" we "Xelq tori" qatarliq barliq hökümet metbu'atlirida Uyghurche, xitayche we in'glizche birla waqitta "Pakit arqiliq shinjangdiki terbiyelesh merkezlirining namini eslige keltürüsh lazim" mawzuluq bir parche bash maqale élan qilindi. Maqalide xitay hökümitining Uyghur élide qurghan lagérliri "Qanun boyiche ochuq-ashkara qurulghan terbiyelesh merkezliri" dep tonushturulush bilen birge bu merkezlerde "Ilgiri yaman ishni yetküche qilghan kishilerning qanun öginip, til öginip, kesip öginip, jem'iyetke yaramliq adem boluwatqanliqi" yene bir qétim teshwiq qilin'ghan.

Shinxu'a agéntliqining bu heqtiki yene bir parche xewirige qarighanda, yéqinda xitay hökümiti yene 7 dölettin kelgen tetqiqatchilarni Uyghur élidiki atalmish "Terbiyelesh merkezliri" ni ziyaret qildurghan. Xewerde "Yéngi zélandiye - xitay dostluq jem'iyiti" ning bashliqi dawid bromwich isimlik kishining bu orunlarni körgendin kéyin "Jama'et bixeterlikini qoghdash üchün Uyghur élide yolgha qoyuluwatqandek tedbirlerning élinishi zörür. Men yéngi zélandiyege qaytip barghinimda choqum bu sepirimde körgenlirimni, yeni ular bilishke tégishlik heqiqiy shinjangni chüshendürimen" dégenliki bayan qilin'ghan.

Uyghurlarning weziyiti üstide pa'al izdiniwatqan gérmaniyelik tetqiqatchi adriyan zénz yuqiriqi xewerge qarita tiwittérda qayturghan inkasida yuqiriqidek atalmish "Xitay dostluq jem'iyetliri" ning nöwette Uyghur élidiki zulumni aqlash üchün heriketke keltürülüwatqanliqini bildürdi. Kishilik hoquqni közitish teshkilati xitay ishliri bölümining diréktori sofi richardson tiwittérdiki inkasida yuqiriqi "Yéngi zéllandiye-xitay dostluq guruppisi" ning bashliqi dawid bromwichqa oxshash "Mejburiy siyasiy idiye terbiyesini yaxshiken dep oylaydighanlarni özliri bérip shu orunlarda bir qanche yil terbiyelinip béqish" qa dewet qildi.

Chet'ellerdiki Uyghur közetküchilerning qarishiche, Uyghur élide qurulghan lagérlarning xelq'arada keng ashkarilinip kétishi xitay hökümitini qattiq bi'aram qiliwatqan bolup, xitay da'iriliri buni özgertish üchün türlük teshwiqat oyunlirini ishqa sélishqa mejbur bolmaqtiken.

Toluq bet