Abdullaning ochuq xéti muhajirettiki Uyghur ösmürlirining qelb sadasi boldi

Awstraliyening wiktoriye shitatidiki yigane Uyghur a'ilisining perzenti abdulla yéqinda “Awstraliye radiyo shirkiti” (ABC) torida öz namidin yézilghan ochuq xetni élan qilip, Uyghur qirghinchiliqining muhajirettiki bir ösmürde eks etken meniwi jarahitini körsetken.

Ochuq xette éytilishiche, 2012-yili a'ilisi boyiche mildura (Mildura) shehirige köchüp kélip makanlashqan abdulla shuningdin étibaren wetendiki uruq-tughqanliri bilen didarliship baqmighan. U özining bu heqtiki hés tuyghulirini ipadilep: “Men sherqiy türkistanda tughulghan. Bizning bayriqimiz ay-yultuzluq kök bayraq. Emma sinipimda shunche nurghun döletlerning bayriqi ésilghan bolsimu, Uyghurlarning bayriqini körüp baqmighan idim” dégen.

U öz xétide awstraliyediki nurghun kishilerning “Uyghur” yaki “Sherqiy türkistan” dégendek atalghularni anglap baqmighanliqini, shunche güzel bolghan maddiy we meniwiy medeniyetke ige Uyghurlarning bilinmigen bir xelq bolup qéliwatqanliqini, emma Uyghurlarning nöwette qirghinchiliqqa uchrawatqan bir qowm ikenlikini tekitligen. Shundaqla Uyghurlardiki yémek-ichmek medeniyiti, sen'et qatarliq mezmunlarning güzellikini tekitlep: “Awstraliyediki Uyghur jama'iti méni öz en'enimizge tutashturghan köwrük boldi” dégen.

Uning öz xelqige, öz medeniyitige we öz wetinige bolghan söygüsi bu qétimliq ochuq xette toluq eks etken bolup, uning öz xelqige erkinlik we hörlük tilishi bilen axirlashqan.