Bir Uyghur yash lagérdiki a'ile ezaliridin tapshuruwalghan xetni ashkariliwetkenliktin tutqun qilin'ghan

Muxbirimiz sada
2019-08-14
Élxet
Pikir
Share
Print

Turpanda sayahet yétekchisi xizmiti bilen shughullinidighan Uyghur yash abduraxman memet lagérdiki ata-anisi we inisidin tapshuruwalghan xetning mezmunini ashkariliwetkenliktin tutqun qilin'ghan.

"Muhapizetchi" gézitining 13-awghusttiki sanida élan qilin'ghan bu heqtiki xewerde déyilishiche, abduraxman memetning ata-anisi we inisi nöwette Uyghur diyaridiki melum bir tutup turush lagérigha qamalghan. Ular ötken yili abduraxman memetke ayrim-ayrim xet ewetip, özlirining lagérda nahayiti yaxshi turmush kechürüwatqanliqini, özlirining hejge bérip xitay qanunigha éghir xilapliq qilghanliqini, halbuki xitay hökümitining ulargha jaza höküm qilishning ornigha ularni toluq eslihelen'gen bir "Kespiy téxnika terbiye mektipi" ge "Terbiyelinishke" ewetilgenlikini bayan qilghan.


Abduraxman memet xetni tapshuruwalghandin kéyin, bu yil iyulda uni in'gliz tiligha terjime qilip, nöwette Uyghur tili tetqiqati bilen shughulliniwatqan amérikaliq tetqiqatchi jéni bonn qurghan "Shahit biz" torigha yollighan. Shuning bilen bu xet torda eng téz sür'ette tarqalghan. Netijide qisqighiche bir hepte ichidila abduraxman memet yoqap ketken.

"Muhapizetchi" gézitining xewiride déyilishiche, abduraxman memet shu xetni chet'elde yashaydighan tughqini muherrem muhemmed élige lagérlarning heqiqiy epti-beshirisini ispatlaydighan pakit süpitide ewetip bergen. Muhemmed élining bildürüshiche, xet "Shahit biz" tori arqiliq ashkarilinip ikki kündin kéyin saqchilar abduraxman memet bilen alaqiliship, bu xetni yene kimler bilen ortaqlashqanliqini sorighan. Iyul éyining axirigha kelgende muherrem muhemmed éli sürüshtürüsh arqiliq taghisining turpanda tutqun qilin'ghanliqidin xewer tapqan.

Mezkur xewerdin melum bolushiche, "Muhapizetchi" géziti abduraxman memetning ehwali heqqide turpandiki yerlik saqchi da'iriliri bilen alaqileshken bolsimu, ulardin héchqandaq inkas bolmighan.

Toluq bet