Bélgiye adriyan zénzning péyige chüshken xitay jasusi gumandari üstidin jinayi tekshürüsh bashlighan

Washin'gtondin muxbirimiz erkin teyyarlidi
2024.01.12

Bélgiye da'iriliri xitay teripidin lagér tetqiqatchisi adriyan zénzning abruyini chüshürüshke wezipilendürülgen bélgiyelik ong qanat siyasiyon frank kréyélman üstidin xitay ‍istixbarati üchün jasusluq qilish gumani bilen jinayi tekshürüsh bashlighan.

Yéqinda “Maliye waqti” géziti”, gérmaniyening “‍Eynek”, firansiyening “Lé mondé” gézitliri birlikte tekshürüsh élip bérish arqiliq bélgiye “Wlamis bélang” radikal ong qanat partiyesining sabiq ezasi frank kréyélmanning üch yildin artuq waqit xitay üchün jasusluq qilghanliqini ilgiri sürgenidi.

“Maliye waqti” gézitining 10-yanwar xewer qilishiche, bélgiye da'iriliri buningdin xewerdar bolghan bolsimu, lékin hazirghiche kréyélman we bashqa gumandarlarning herikiti bélgiyede jasusluq qilmishi, dep qaralmighachqa ularni jawabkarliqqa tartmay kelgeniken.

Lékin bélgiye edliye ministiri pa'ul fon tégchélt 10-yanwar charshenbe küni frank kréyélmanning délosi bélgiye fédiratsiye saqchi idarisining chériklikke qarshi turush tarmaqliri teripidin fédiratsiye teptish da'irilirige tapshurulghanliqini éytqan. “Maliye waqti” gézitining bildürüshiche, bélgiye fédiratsiye teptish mehkimisining bayanatchisi érik fon duys, “Fédiratsiye teptish ishxanisining resmiy tekshürüsh bashlighanliqi” ni delilligen. Emma ilgirilep uchur bilen teminleshni ret qilghan.

Bélgiye edliye ministiri fon tégchélt, frank kréléymanning délosi ötken yili 12-ayda fédiratsiye saqchi idarisi chériklikke qarshi turush ‍ishxanisining diqqitini qozghap, uning délosining teptish da'irilirige yollan'ghaliqini ‍éytqan. “Maliye waqti”, “Eynek” we lé mondé” gézitliri yéqinda élan qilghan tekshürüsh doklatida, kréléymanning xitay dölet bixeterlik ministirliqi emeldaridin yolyoruq alghanliqi, uning amérikadiki “Kommunizm qurbanliri xatire fondi” ning aliy tetqiqatchisi, lagér mutexessisi adriyan zénzning abruyini chüshürüshke buyrulghanliqigha a'it höjjetlerni ashkarilighan.

Bélgiye teptish da'irilirining frank kréléyman üstidin délo turghuzushi, bélgiye bash ministiri aléksandir dé kru 11 we 12-yanwar künliri xitayda ziyarette bolghan bir peytke toghra keldi. Dé kruning xitay ziyariti bashlan'ghan 11-yanwar küni dunya Uyghur qurultiyi bayanat élan qilip, bélgiye bash ministirining xitayda Uyghur irqiy qirghinchiliq mesilisini küntertipke élip kélishini telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.