Adriyan zénz: “Uyghur rayonida türmidikilerdin sirt, bir yérim milyon musulman lagérda”

Muxbirimiz shöhret hoshur
2019-03-13
Share

Uyghur weziyiti tetqiqatidiki yétekchi shexslerdin gérmaniyelik mutexessis adriyan zénz bügün jenwediki b d t yighinida qilghan sözide Uyghur rayonida türmidikilerni hésabqa almighanda yighiwélish lagérlirining özidila 1 milyon 500 mingche kishining qamaqliq ikenlikini otturigha qoyghan.

Uyghur rayonidiki chonglar nopusidin (qorumigha yetken kishilerdin) her alte kishidin birining nöwette lagérda ikenlikini ilgiri sürgen adriyan zénz, bu sanni lagérlar heqqidiki sün'iy hemrah süretlirige, xitay hökümet xirajetlirige we guwahchilarning lagérdiki tiqma-tiqmichiliq heqqidiki we ghayib bolghan a'ile-tawabi'atliri heqqidiki bayanlirigha asasen hésablap chiqqanliqini otturigha qoyghan.

Deslepki tetqiqatlarda Uyghur rayonida 1 milyon kishining lagérda ikenlikini otturigha qoyghan bu adriyan zénz mezkur lagérlarda sistémiliq halda étnik we diniy kimlikni yoq qilishni meqset qilghan medeniyet qirghinchiliqi élip bériliwatqanliqini bayan qilghan we buninggha qarita tedbir élinishi kéreklikini tewsiye qilghan.

Bu yighin'gha qatnashqan lagér guwahchisi ömer bek'eli lagérda qiyin-qistaq barliqi, shi jinpingning üzündilirining mejburiy yadlitilidighanliqi we özining 6 ayghiche kichik bir öyge 40 kishi bilen solan'ghanliqini pash qilghan.

Roytérs agéntliqining bügünki bu heqtiki xewiride bayan qilinishiche, mezkur yighin'gha qatnishiwatqan amérikaning b d t diki bash elchisi kelly kurry xanim muxbirlarning so'aligha jawaben amérikaning nöwette Uyghur rayonidiki mezkur kishilik hoquq depsendichilikide jawabkarliqi bar bolghan kishilerni amérikigha kirgüzmeslik we ularning amérikining iqtisadiy sistémiliridin paydilinishini cheklesh toghrisida mumkinchiliki bar bolghan barliq tedbirler üstide oylishiwatqanliqini bayan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet