Афғанистан һәр қандақ күчниң афғанистанни база қилип, хитайға қарши һәрикәт қилишиға йол қоймайдиғанлиқини билдүрди

Мухбиримиз әркин
2016-05-20
Share

Афғанистан хитай билән қошма ахбарат елан қилип, хитайниң «шәрқий түркистан ислам һәрикити» вә уни қоллаватқан гуруһларға қарши күришини қоллайдиғанлиқини, конкрет тәдбир қоллинип, афғанистандики хитай органлирини вә пуқралирини қоғдайдиғанлиқини билдүргән.

Икки тәрәп қошма ахбарати афғанистан баш иҗраийә әмәлдари абдулла абдулланиң хитай зияритидә имзаланди. Абдулла 15‏-майдин 18‏-майға қәдәр хитайни зиярәт қилған. Хитай баш министири ли кечяң абдуллани мурасим өткүзүп күтүвалған иди.

Икки тәрәп қошма ахбаратида йәнә, «афғанистан тәрәп бир хитай сияситидә чиң туриду. Хитайниң тәйвән, тибәт шинҗаңға алақидар мәсилиләрдики позитсийәсини қоллайду. Афғанистан һәр қандақ күчниң өз территорийәсини қоллинип, хитайға қарши бөлгүнчи һәрикәтләр билән шуғуллинишиға йол қоймайду» дейилгән.

Хитай һөкүмити шәрқий түркистан ислам һәрикити қораллиқ гуруһиниң афғанистанда һәрикәт елип бериватқанлиқини, уйғур районидики бәзи вәқәлирини шуларниң пиланлиғанлиқини қәйт қилип кәлгән болсиму, әмма у буниңға һечқандақ дәлил көрситип бақмиған.

Бәзи мутәхәссисләр, бу тәшкилатниң мәвҗутлуқи гуманлиқ қарайдиғанлиқини илгири сүрүп кәлгән.

Шинхуа агентлиқиниң ашкарилишичә, икки тәрәп қошма ахбаратида йәнә, хитай афғанистан тинчлиқ мусаписини давамлиқ қоллашқа, афғанистан һөкүмитигә 500 милйон йүән һәқсиз ярдәм беришкә, 50 милйон йүән аҗритип, кабул университетиға бир бина селип беришкә вәдә бәргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт