Хитай һөкүмитиниң “қишлиқ ярдәм буюмлири” афғанистанға тошулушқа башлиди

Америка армийәси чекинип чиққандин кейин, афғанистан вәзийитидә көрүлгән бир зор өзгириш хитай һөкүмитиниң бу районға сиқилип кириши болған иди. Йеқинда хитай һөкүмитиниң афғанистан хәлқигә “қишлиқ ярдәм” үчүн тәйярлиған буюмлирини афғанистанға тошулушқа башлиғанлиқи елан қилинди.

Хитай һөкүмити башқуришидики “хитай хәвәр тори” ниң 24-ноябирдики хәвиридә ейтилишичә, хитай ташқи ишлар министирликиниң баянатчиси җав лиҗйән 22-ноябирдики мухбирларни күтүвелиш йиғинида: “дөлитимизниң афғанистан хәлқигә әвәткән ярдәм буюмлири бесилған үчинчи йүк пойези йолға чиқти” дегән. Хәвәрдә бу “ярдәм буюмлири” ниң қишлиқ кийим-кечәк, гиләм вә кигиз, нан вә сүт талқини қатарлиқ нәрсиләр икәнлики ейтилиду. Җав лиҗйән бу һәқтә сөз қилип: “афғанистан хәлқи әң еғир күнләрни баштин кәчүриватқанда, биз уларға инсанпәрвәрлик ярдими қиливатимиз” дегән.

Һалбуки, бир қисим хәлқаралиқ мунасивәт мутәхәссислири хитай һөкүмитини “америка бу җайдин чекинип чиққандин кейин униң орнини игиләшкә урунмақта” дәп қараватқанлиқи мәлум. Йәнә келип йеқинда хитай һөкүмитиниң уйғур дияридики уйғур навайларни пүтүнләй бир җайға топлап, уларни милйонлап нан йеқишқа тәшкилләватқанлиқи, бу нанларниң оттура асия вә хитай өлкилиригә йөткиливатқанлиқи һәққидә учурлар мәлум болған иди.