Kishilik hoquq adwokati ju shiféng aghdurmichiliq jinayiti bilen 7 yilliq qamaq jazasigha uchridi

Roytérsning xewer qilishiche, xitay kishilik hoquq adwokati ju shiféng “Hakimiyetni aghdurushqa urunush jinayiti” bilen 7 yilliq qamaq jazasigha höküm qilin'ghan. Bu yil 51 yashqa kirgen ju shiféng béyjingdiki “Féngruy adwokatliq shérkiti”ning dériktori bolup, u ötken yili xitay hökümiti teripidin tutqun qilin'ghan 300 din artuq kishilik hoquq adwokatlirining ichidiki biri idi.

Xitayning shinxu'a agéntliqi bu heqtiki xewiride ju shiféngning xitaygha qarshi küchlerning tesirige uchrap, délolarni köptürüp teshwiq qilghanliqini, intérnét torida we sirtta “Hökümetni aghdurush” toghriliq söz qilghanliqini ilgiri sürgen.

Ju shiféngning adwokatliq shérkiti nurghun muhim délolarni, jümlidin Uyghur ziyaliysi ilham toxtining délosinimu üstige alghan idi. Xewerdin melum bolushiche, da'iriler ju shiféngni “Naraziliq namayishlirini teshkillep, délolarni siyasiylashturghan we xelq'ara jama'et pikri toplashqa urun'ghan” dep eyibligen. Melum bolushiche, ju shiféng özining yuqiri sotqa erz sunmaydighanliqini éytqan.

Xitay hökümiti téxi aldinqi künila ju shiféngning adwokatliq shérkitide ishleydighan we yene shu ötken yili tutqun qilin'ghan adwokatlardin biri bolghan wang yüning téléwiziyide atalmish iqrarnamisi'i élan qilip, uning chet'ellerdiki xitaygha qarshi küchlerning aldam xaltisigha chüshüp ketkenlikini ilgiri sürgen, shundaqla yene, adwokat jey yenménni aghdurmichiliq qilishqa urunush jinayiti bilen 3 yilliq qamaq jazasigha höküm qilghan idi. Yuqiridiki weqeler kishilik hoquq organlirining küchlük tenqidige uchrimaqta. Xelq'ara kechürüm teshkilati bu heqtiki bayanatida, bu sotlarni saxta, dep tenqid qilghan.