72 Йиллиқ сүргүнлүк тарихидин кейин аһиста түрклири түркийәгә йәрлишиш пурситигә еришкән

Мухбиримиз қутлан
2016-11-20
Share

Түркийә таратқулириниң илгири сүришичә, йеқинда украинадин йолға чиққан 99 аилидики 529 нәпәр аһиста түрклири түркийәниң әрзинҗан вилайитигә йетип кәлгән.

Бу сабиқ советләр иттипақиниң һәрқайсий иттипақдаш җумһурийәтлиригә чечиветилгән аһиста түрклириниң түркийәгә көчүрүп келингән 4-түркүми икән.

Түркийә авази радийосиниң бу һәқтики хәвиригә қариғанда, җумһуррәис әрдоған билән баш министәр бинали йилдирим 70 нәччә йиллиқ сәрсанлиқ қисмитини бешидин көчүргән аһиста түрклирини түркийәгә йәрләштүрүш һәққидә алаһидә йолйоруқ бәргән. Алдинқи үч түркүмдә аһиста түрклиридин 1206 киши түркийәгә елип келинип йәрләштүрүлгән.

Бу қетим түркийәгә елип келингән аһиста түрклири түркийә авази радийосиниң зияритини қобул қилип, өзлириниң 70 нәччә йиллиқ сәрсанлиқтин кейин ана вәтинигә қайтип келишкә муйәссәр болғанлиқини, болупму пәрзәнтлиригә өз вәтинидә яшаш һоқуқини қайтуруп бәргәнликидин чәксиз хошал икәнликини билдүргән.

Мәлумки, аһиста түрклири 1944-йили ноябирда сталинниң буйруқи билән аһиста районидин совет иттипақиниң оттура асия җумһурийәтлиригә көчүрүп берилип чечиветилгән. Улар 70 нәччә йилдин буян қазақистан, өзбекистан, қирғизистан, украина қатарлиқ җайларда сәрсан-сәргәрдан болуп көрмигән күни қалмиған. Сталин әйни вақитта аһиста түрклирини худди кафказийәдики чечин, ингуш, қарачай вә қиримдики татарларға охшаш "уруш мәзгилидә германлар билән һәмкарлашқан" дегән баһанә билән пүтүн милләт гәвдиси бойичә сүргүн қилған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт