Xelq'ara öy ijare shirkiti ‏‏-Airbnb ning xitayda Uyghurlarning kemsitilishige yol qoymasliqi telep qilindi

Muxbirimiz erkin
2019.05.03

Amérikadiki xelq'ara öy ijare bérish shirkiti ‏-a'irbnb ning xitaydiki öy ijare bergüchi xéridarlirining Uyghurlarni kemsitishige yol qoymasliqi, uning derhal bayanat élan qilip, bu xil qilmishni tenqid qilishi telep qilindi. Amérikadiki “Wayrid” namliq axbarat torining ashkarilishiche, mezkur shirketning xitaydiki xéridarlirining öy ijare bérish heqqidiki élanlirida Uyghur tibet we bashqa az sanliq milletlerge öy ijare bérishi ret qilinip, bu milletler ashkara kemsitilmektiken.

Xewerde, Uyghurlarning uzundin béri sayahet qilishta qiyinchiliqqa uchraydighanliqi, saqchilarning parakendichiliki we keng tarqalghan irqchiliq ularning méhman saraylarda yétishini cheklep kéliwatqanliqi bildürülgen. Xewerde, chongchingdiki ikki éghizliq bina öyini ijarige chiqarghan bir xitay puqrasining sözi neqil keltürülgen bolup, uning “Uyghur bolsingiz ijarige almang, saqchixana Uyghurgha öy ijare bérishimizgha ruxset qilmaydu” dégenliki tekitlen'gen. Chongchingdiki yene bir xitay ijarikeshning élanida bolsa “Yerlik belgilime seweblik öy tibet we Uyghur méhmanlargha ijarige bérilmeydu” déyilgen. Qeyt qilinishiche, ular Uyghurlarni chekleydighan bundaq élandin 35 ni tapqan.

Xewerde déyilishiche, Airbnb shirkiti ular bayqighan bu élanlarning yérimini öchürüp tashlighan bolsimu, emma buninggha pikir bildürüshni ret qilghan. Xewerde yene, bu xil kemsitish qilmishi kishilik hoquq teshkilatlirining tenqidige uchrighanliqi, bu shirketning bayqut qilinish xewpige duch kélishi mumkinliki bildürülgen. Xewerde qeyt qilinishiche, kishilik hoquqni közitish teshkilatining aliy derijilik tetqiqatchisi maya wang, “Ular xitayda az sanliq milletlerge qarshi yüz bériwatqan irqchiliq we kemsitish qilmishlirigha hesse qoshmasliqi kérek” dégen. Awstraliyelik Uyghurshunas jéymis léybold a'irbnb ning bu xil ochuq-ashkara kemsitishni derhal tenqid qilishi kéreklikini bildürüp, “Uning nami we torini qollinip, bashqilarni kemsitishke urun'ghan herqandaq élanni öchürüp tashlishi kérek” dep körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.