Тонулған өктичи сәнәткар әй вейвей уйғур елидики лагерларни “21-әсирдики қорқунчлуқ бир һадисә” деди

• Мухбиримиз ирадә
  2019-01-10

Хитайдин сүргүн қилинған тонулған өктичи сәнәткар әй вейвей америка с н н теливизийәсиниң зияритини қобул қилғанда уйғур елидики лагерлар үстидә тохталди. У сөзидә өзиниң уйғур елида чоң болғанлиқини вә уйғур елида кишиләрниң лагерларға қамилип, өз ирадисигә хилап һалда компартийәниң идийисини өгинишкә мәҗбурлиниватқанлиқини билдүргән вә уни “бу 21-әсирдә йүз бериватқан қорқунчлуқ бир һадисә” дәп көрсәткән.

У сөзи давамида хитай һөкүмитиниң та 1949-йилидин тартипла уйғур елида мушу түрдики сиясәтләрни йүргүзүп кәлгәнликини ипадә қилиш билән биргә өзиниң аилисиниңму хитай компартийисиниң мушундақ идийә өзгәртиш яки қайта тәрбийә сияситиниң қурбани икәнликини, дадисиниң хитай һөкүмити тәрипидин 20 йил уйғур елигә палинип, еғир әмгәккә селинғанлиқини баян қилған. 

Әй вейвей хитай компартийисиниң бундақ идийә өзгәртиш сиясәтлирини чоқум мәғлуп болиду, дәп қарайдиғанлиқини ипадә қилған.

Әй вейвей атақлиқ модернизм сәнәткари. У “чаңга” намлиқ 2008‏-бейҗиң олимпик мусабиқә мәйданиниң сәнәт лайиһәлигүчиси иди. Бирақ әй вейвей хитайдики кишилик һоқуқ дәпсәндичиликлирини вә хитай компартийисиниң сиясәтлирини тәнқидлигәчкә 2011‏-йили тутқун қилинип, 81 күн солап қоюлған вә кейин чәтәлләргә сүргүн қилинған иди.