Корлалиқ ака-ука тиҗарәтчиләрдин мәмәт һәмдулниң 15 йил кесилгәнлики илгири сүрүлди

Мухбиримиз әркин
2020-01-06
Share

2017-Йили өктәбирдә тутқун қилинип, һазирға қәдәр һечқандақ из-дерики болмиған корлалиқ ака-ука тиҗарәтчиләрдин мәмәт һәмдулниң 15 йил кесилгәнлики илгири сүрүлди.

Мәмәт һәмдул корлалиқ атақлиқ тиҗарәтчи, «шинҗаң рози һаҗи чәклик ширкити» вә «корла чиланбағ өй-мүлүк ширкити» ниң лидири рози һаҗи һәмдулниң иниси болуп, радийомиз өткән йили 8‏-айда 43 яшлиқ рози һаҗи һәмдулниң 25 йил кесилгәнликини хәвәр қилған. Лекин мәмәт һәмдулниң ақивити һәққидә һечқандақ учурға еришәлмигән иди.

Италийәдики «зимистан» намлиқ диний әркинлик ториниң 4‏-январ ашкарилишичә, 37 яшлиқ мәмәт һәмдул 15 йил кесилгән. Хәвәрдә бу учурни рози һаҗи һәмдул билән мәмәт һәмдулниң түркийәдики кичик иниси өмәрҗан һәмдулниң тәминлигәнлики яки бу учурға «зимистан» ториниң өзи еришкәнлики ениқ тәкитләнмигән.

Өмәрҗан һәмдул өткән йили радийомизға чоң акиси рози һаҗи һәмдулниң 25 йил кесилгәнликини билдүрүп, бу учурни бурун акисиниң ширкитидә ишлигән бир хитайниң тәминлигәнлики, лекин кичик акиси мәмәт һәмдулниң һечқандақ учурини алалмиғанлиқини билдүргән иди.

Нөвәттә түркийәдә оқуватқан өмәрҗан һәмдулниң акилири билән болған алақиси 2017‏-йили өктәбирдин бери үзүлүп қалған. «Зимистан» тори бу учурни хитай һөкүмити өзиниң «йәр шари телевизийә тори», йәни CGTN дә муһаҗирәттики уйғурларниң уруқ-туғқанлирини сүрүштүрүш һәрикитигә қарши кәң көләмлик тәшвиқат һуҗуми қозғиған мәзгилдә елан қилди.

«Зимистан» ториниң хәвиридә қәйт қилинишичә, рози һаҗи һәмдул билән мәмәт һәмдулға даир дәлилләр хитайниң «һәммә уйғур өйидә хатирҗәм яшимақта» дегән тәшвиқатиниң ялғанлиқини ечип бәргән. Муһаҗирәттики уйғурлар өткән йили иҗтимаий таратқуларда «#техичә уйғур йоқ» намлиқ һәрикәт қозғап, хитай һөкүмитидин ғайиб болған уруқ-туғқанлириниң ақивитигә җаваб беришни тәләп қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.