Korlaliq aka-uka tijaretchilerdin memet hemdulning 15 yil késilgenliki ilgiri sürüldi

Muxbirimiz erkin
2020-01-06
Élxet
Pikir
Share
Print

2017-Yili öktebirde tutqun qilinip, hazirgha qeder héchqandaq iz-dériki bolmighan korlaliq aka-uka tijaretchilerdin memet hemdulning 15 yil késilgenliki ilgiri sürüldi.

Memet hemdul korlaliq ataqliq tijaretchi, "Shinjang rozi haji cheklik shirkiti" we "Korla chilanbagh öy-mülük shirkiti" ning lidiri rozi haji hemdulning inisi bolup, radiyomiz ötken yili 8‏-ayda 43 yashliq rozi haji hemdulning 25 yil késilgenlikini xewer qilghan. Lékin memet hemdulning aqiwiti heqqide héchqandaq uchurgha érishelmigen idi.

Italiyediki "Zimistan" namliq diniy erkinlik torining 4‏-yanwar ashkarilishiche, 37 yashliq memet hemdul 15 yil késilgen. Xewerde bu uchurni rozi haji hemdul bilen memet hemdulning türkiyediki kichik inisi ömerjan hemdulning teminligenliki yaki bu uchurgha "Zimistan" torining özi érishkenliki éniq tekitlenmigen.

Ömerjan hemdul ötken yili radiyomizgha chong akisi rozi haji hemdulning 25 yil késilgenlikini bildürüp, bu uchurni burun akisining shirkitide ishligen bir xitayning teminligenliki, lékin kichik akisi memet hemdulning héchqandaq uchurini alalmighanliqini bildürgen idi.

Nöwette türkiyede oquwatqan ömerjan hemdulning akiliri bilen bolghan alaqisi 2017‏-yili öktebirdin béri üzülüp qalghan. "Zimistan" tori bu uchurni xitay hökümiti özining "Yer shari téléwiziye tori", yeni CGTN de muhajirettiki Uyghurlarning uruq-tughqanlirini sürüshtürüsh herikitige qarshi keng kölemlik teshwiqat hujumi qozghighan mezgilde élan qildi.

"Zimistan" torining xewiride qeyt qilinishiche, rozi haji hemdul bilen memet hemdulgha da'ir deliller xitayning "Hemme Uyghur öyide xatirjem yashimaqta" dégen teshwiqatining yalghanliqini échip bergen. Muhajirettiki Uyghurlar ötken yili ijtima'iy taratqularda "#Téxiche Uyghur yoq" namliq heriket qozghap, xitay hökümitidin ghayib bolghan uruq-tughqanlirining aqiwitige jawab bérishni telep qilghan idi.

Toluq bet