Yurtigha qaytqan ali mektep oqughuchilirning léksiye sözlesh pa'aliyetliri dawamlashmaqta

“Yurtigha qaytqan tümenming oqughuchining seyyare notuq sözlesh pa'aliyiti” dep hökümet teripidin nam bérilgen, yazliq tetil qilish üchün öylirige qaytip kelgen ali mektep oqughuchilirini herqaysi yéza - bazar, meydan we kocha bashqarmilirida nutuq sözleshke teshkillesh pa'aliyiti 20 kündin buyan her qaysi jaylarda dawamlashmaqta.

Xelq torining 30 - iyul küni xewer qilishiche, mezkur programma boyiche aqsu ma'arip komitéti we xizmet guruppisi aqsu shehirining herqaysi yéza - bazar, meydan we kocha bashqarmilirida, 10 - iyuldin bashlap bu xil pa'aliyetlerni dawamlashturup kelmekte.

“Junggo tori”ning 16 - iyuldiki xewiride éytilishiche, qizilsu qirghiz aptonom oblastidimu bu pa'aliyet kücheytilgen bolup, her qaysi xizmet guruppiliri her jaylardiki a'ililerge kirip, a'ilisige qaytip kelgen oqughuchilarning a'ile ehwali we ipadisi heqqide uchur igilesh, tizimlash hem bu oqughuchilar bilen söhbetliship ularning ehwalini igilesh ishliri élip barghan. Da'iriler, mezkur oqughuchilarning xitay tili bilish, shu jayning ehwalini bilish, ammining ehwali bilen tonush bolush qatarliq alahidilikliridin paydilinip, ularni yéza,mehellilerdiki ammigha nutuq sözleshke teshkillesh xizmiti élip barghan idi.

Xelq torining xewridin melum bolushiche, aqsudiki a'ilisige qaytqan oqughuchilarni seyyare notuq sözleshke teshkillesh pa'aliyitining meqsiti xitay kompartiyisi we döletning “Shinjangni yölesh siyasitini, partiyining ghemxorluqi we döletning qollishini zor küch bilen teshwiq qilish, diniy esebiylikni tügitish qatarliq mezmunlarni keng kölemde teshwiq qilish”arqiliq weten birliki we milletler ittipaqliqini kücheytish iken.