"али баба" гуруһиниң уйғурларни пәрқләндүридиған юмшақ детални базарға салғанлиқи ашкариланди

Мухбиримиз ирадә
2020-12-17
Share

Хитайниң "али-баба" гуруһиниң уйғурларниң чирай-шәклини пәрқләндүридиған юмшақ детални базарға салғанлиқи ашкариланди.

Америкадики көзитиш-назарәт системилири үстидә тәтқиқат елип баридиған "IPVM" шеркитиниң 17-декабир ашкарилишичә, "али баба" горуһи хитайдики тор беـтидә базарға салған бу юмшақ детал адәттә тор бәтләр үчүн ишлитилидиған юмшақ детал болуп, уйғурларниң чирайини пәрқләндүрәләйдиған иқтидарға игә икән. Җүмлидин, әгәр мәлум бир тор бәттә бу детал ишлитилгән болса, у һалда у тор бәткә йолланған сүрәт вә видейолардики чирайларниң уйғурларға аитлиқини бәлгиләп чиқалайдикән вә дәрһал сегнал йоллайдикән.

Юқириқи органниң билдүрүшичә, улар буни "али баба" ниң булут қалқини мулазимитидә байқиған болуп, али бабаниң хитайдики тор беـти бу юмшақ детал һәққидики чүшәндүрүшидә мәхсус уйғурларни тепишни нишан қилидиған бу "иқтидар" ни очуқ-ашкара базарға салған вә қәдәмму-қәдәм униң ишлитилиш усулини өгәткән.

IPVM Мундақ дегән: "хитайдики абонтлар мәйли телефон арқилиқ тартқан көрүнүшләр болсун яки көзитиш камералиридики көрүнүшләрни болсун, наһайити асанла бу кишиләрниң рәсимлирини али баба тәминләйдиған мулазимитиргә әвәтәләйду. Нәтиҗидә әгәр али баба бу көрүнүшләрдә уйғурларниң барлиқидин гуманланса, у кишигә бәлгә селип қойиду."

Юқириқи бу хәвәр бүгүн "ню-йорк вақти гезити", "муһапизәтчи" гезити қатарлиқ ахбаратларда елан қилинип ғулғула қозғиди. Техи йеқинда хитайниң хуавей ширкитиниң чирай сканнерлаш камера системиси арқилиқ сақчиға "уйғурлардин агаһландуруш сигнали" әвәтәләйдиған сүний идраклиқ назарәт қилиш техникисини тәрәққий қилдурушқа қатнашқанлиқи ашкариланған иди.

Юқириқи бу пакитлар хитайниң уйғурларға қаритиватқан зулуминиң көлимини йәниму толуқ намайән қилиш билән биргә, хәлқарада бу шеркәтләр билән алақини үзүш һәққидә йәниму зор бесим шәкилләндүрүши мумкин.

"муһапизәтчи" гезитиниң ейтишичә, али баба шеркити хәвәрләр ашкариланғандин кейин дәрһал тор бетидики дәлил-испатларни өчүрүвәткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт