"Ali baba" guruhining Uyghurlarni perqlendüridighan yumshaq détalni bazargha salghanliqi ashkarilandi

Muxbirimiz irade
2020-12-17
Share

Xitayning "Ali-baba" guruhining Uyghurlarning chiray-sheklini perqlendüridighan yumshaq détalni bazargha salghanliqi ashkarilandi.

Amérikadiki közitish-nazaret sistémiliri üstide tetqiqat élip baridighan "IPVM" shérkitining 17-dékabir ashkarilishiche, "Ali baba" goruhi xitaydiki tor béـtide bazargha salghan bu yumshaq détal adette tor betler üchün ishlitilidighan yumshaq détal bolup, Uyghurlarning chirayini perqlendüreleydighan iqtidargha ige iken. Jümlidin, eger melum bir tor bette bu détal ishlitilgen bolsa, u halda u tor betke yollan'ghan süret we widéyolardiki chiraylarning Uyghurlargha a'itliqini belgilep chiqalaydiken we derhal ségnal yollaydiken.

Yuqiriqi organning bildürüshiche, ular buni "Ali baba" ning bulut qalqini mulazimitide bayqighan bolup, ali babaning xitaydiki tor béـti bu yumshaq détal heqqidiki chüshendürüshide mexsus Uyghurlarni tépishni nishan qilidighan bu "Iqtidar" ni ochuq-ashkara bazargha salghan we qedemmu-qedem uning ishlitilish usulini ögetken.

IPVM Mundaq dégen: "Xitaydiki abontlar meyli téléfon arqiliq tartqan körünüshler bolsun yaki közitish kaméraliridiki körünüshlerni bolsun, nahayiti asanla bu kishilerning resimlirini ali baba teminleydighan mulazimitirge eweteleydu. Netijide eger ali baba bu körünüshlerde Uyghurlarning barliqidin gumanlansa, u kishige belge sélip qoyidu."

Yuqiriqi bu xewer bügün "Nyu-york waqti géziti", "Muhapizetchi" géziti qatarliq axbaratlarda élan qilinip ghulghula qozghidi. Téxi yéqinda xitayning xu'awéy shirkitining chiray skannérlash kaméra sistémisi arqiliq saqchigha "Uyghurlardin agahlandurush signali" eweteleydighan sün'iy idrakliq nazaret qilish téxnikisini tereqqiy qildurushqa qatnashqanliqi ashkarilan'ghan idi.

Yuqiriqi bu pakitlar xitayning Uyghurlargha qaritiwatqan zulumining kölimini yenimu toluq namayen qilish bilen birge, xelq'arada bu shérketler bilen alaqini üzüsh heqqide yenimu zor bésim shekillendürüshi mumkin.

"Muhapizetchi" gézitining éytishiche, ali baba shérkiti xewerler ashkarilan'ghandin kéyin derhal tor bétidiki delil-ispatlarni öchürüwetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet