Amérika xitayning alibaba torini bu yilliq “Yaman ataqliq bazarlar” tizimlikige kirgüzidu

Amérika soda da'iriliri xitay intérnét shirkiti-alibabani bu yilliq nachar mal satidighan “Yaman ataqliq bazarlar” tizimlikige kirgüzidighanliqini élan qildi.

Birleshme agéntliqining xewer qilishiche, amérika soda wekili ishxanisi, alibananing tor baziri-“Gowbaw” ning neshr hoquqi oghrilan'ghan buyum we mehsulatlarni sétish ehwali qobul qilghusiz derijige bérip yetkenlikini bildürüp, original shirketler “Gowbaw”ning herikitige naraziliq bildürgen bolsimu, emma alibabaning héchqandaq tedbir qollanmighanliqini ilgiri sürgen.

Amérika 2012‏-yili alibabani “Yaman ataqliq bazarlar” tizimlikidin chiqiriwetken. Emma bu, bezi amérika soda uyushmilirining naraziliqini qozghighan. Ular alibabani tekrar “Paxot mallar baziri”tizimlikige kirgüzüshni qattiq telep qilip kelgen idi.

Alibabaning ijra'iye diréktori maykél éwans, amérika soda da'irilirining qararidin epsuslan'ghanliqini bildürgen. U, amérika terepning qarari “Emeliy ehwalgha qarap chiqirildimu yaki hazirqi siyasiy muhitning tesirige uchridimu, bunisi gumanliq” dégen.

Amérikining 45‏-nöwetlik prézidéntliqigha saylan'ghan donald tramp ilgiri xitayni amérikining eqliy mülk patintini oghrilash bilen tenqid qilghan. U yéqinda xitaygha sodida qattiq bolushni tekitlep kelgen iqtisadshi'unas pétir nawaroni amérika döletlik soda kéngishining mes'ulluqigha teyinligen idi.