Алма ширкитиниң хитайдики завути хизмәтчи елишта уйғур вә тибәтләрни кәмситкәнлики ашкариланди

Мухбиримиз әркин
2019-03-11
Елхәт
Пикир
Share
Принт

Дунядики әң чоң iPhone намлиқ янфон ишләпчиқириш ширкити, тәйвән «хоңхәй технологийә гуруһи» ниң җеңҗудики iPhone ишләпчиқириш завутиниң уйғур вә тибәтләрни кәмситкәнлики ашкариланди.

«Инкстон» намлиқ бир шәрқий асия хәвәр мунбириниң ашкарилишичә, мәзкур һөддигәрлик ширкитиниң җеңҗу шәһиридики завути йеқинда хизмәтчи қобул қилиш елан чиқарған.

Еланда тибәт вә уйғурларниң илтимас қилмаслиқи алаһидә тәкитләнгән. «Хоңхәй гуруһи» дәк алма ширкити үчүн iPhone намлиқ янфон ишләпчиқиридиған бир ширкәтниң еланида уйғур вә тибәтләрниң кәмситилиши мәзкур хәвәр мунбириниң диққитини қозғиған. Хәвәрдә баян қилинишичә, «инкстон» ниң мухбири 11‏-март күни «хоңхәй гуруһи» билән алақилишип, бу әһвални сүрүштүргән.

Хәлқарада «фокскан» дегән нам билән тонулған «хоңхәй гуруһи» мәзкур вәқәни тәкшүрүшкә башлиғанлиқи, хизмәткә қобул қилиштики кәмситиш қилмишлириға хатимә беридиғанлиқини тәкитлигән.

Мәзкур ширкәт «инкстон» ға әвәткән баянатида, «бизниң диққитимизни қозғиған бу вәқәдә бир ишқа тонуштуруш орни бизниң рухситимизсиз вә фоксканниң мақуллуқисиз ишқа тонуштурушта бизниң намимизни қанунсиз қолланған болуши мумкин» дегән.

Баянатта илгири сүрүлүшичә, бу ширкәт «мәзкур қанунсиз вәқәни дәрһал йәрлик һөкүмәт даирилиригә мәлум қилған болуп, нөвәттә ишқа тонуштуруш орни сүрүштүрүлмәктә» икән. Лекин көзәткүчиләр «хоңхәй гуруһи» мәсулийәтни башқиларға дөңгәп қойған болсиму, әмма хитай ширкәтлириниң уйғурларни ишқа алмайдиғанлиқи, һөкүмәтниң уларни тутқун қилип, лагерларға қамайдиғанлиқиниң реаллиқ икәнликини тәкитлимәктә.

«Инкстон» ниң хәвиридә, бу вәқә алма ширкитигә iPhone ишләйдиған хитайдики завутларниң уйғур вә тибәтләрни тунҗи қетим кәмситиши әмәслики билдүрүлгән. Хәвәрдә баян қилинишичә, 2013‏-йили алма ширкитигә iPhone ишләпчиқиридиған пегатрон намлиқ ширкәтниң хитайдики икки завути охшашла аз санлиқ милләтләрни кәмситиш билән әйибләнгән икән. Әйни чағда «хитай әмгәк көзитиш тәшкилати» бу завутларниң туңган, тибәт вә уйғурларни хизмәткә қобул қилишни рәт қилғанлиқини тәнқидлигән икән.

Пикирләр (0)
Share
Толуқ бәт