Alma shirkitining xitaydiki zawuti xizmetchi élishta Uyghur we tibetlerni kemsitkenliki ashkarilandi

Muxbirimiz erkin
2019-03-11
Élxet
Pikir
Share
Print

Dunyadiki eng chong iPhone namliq yanfon ishlepchiqirish shirkiti, teywen "Xongxey téxnologiye guruhi" ning jéngjudiki iPhone ishlepchiqirish zawutining Uyghur we tibetlerni kemsitkenliki ashkarilandi.

"Inkston" namliq bir sherqiy asiya xewer munbirining ashkarilishiche, mezkur höddigerlik shirkitining jéngju shehiridiki zawuti yéqinda xizmetchi qobul qilish élan chiqarghan.

Élanda tibet we Uyghurlarning iltimas qilmasliqi alahide tekitlen'gen. "Xongxey guruhi" dek alma shirkiti üchün iPhone namliq yanfon ishlepchiqiridighan bir shirketning élanida Uyghur we tibetlerning kemsitilishi mezkur xewer munbirining diqqitini qozghighan. Xewerde bayan qilinishiche, "Inkston" ning muxbiri 11‏-mart küni "Xongxey guruhi" bilen alaqiliship, bu ehwalni sürüshtürgen.

Xelq'arada "Fokskan" dégen nam bilen tonulghan "Xongxey guruhi" mezkur weqeni tekshürüshke bashlighanliqi, xizmetke qobul qilishtiki kemsitish qilmishlirigha xatime béridighanliqini tekitligen.

Mezkur shirket "Inkston" gha ewetken bayanatida, "Bizning diqqitimizni qozghighan bu weqede bir ishqa tonushturush orni bizning ruxsitimizsiz we fokskanning maqulluqisiz ishqa tonushturushta bizning namimizni qanunsiz qollan'ghan bolushi mumkin" dégen.

Bayanatta ilgiri sürülüshiche, bu shirket "Mezkur qanunsiz weqeni derhal yerlik hökümet da'irilirige melum qilghan bolup, nöwette ishqa tonushturush orni sürüshtürülmekte" iken. Lékin közetküchiler "Xongxey guruhi" mes'uliyetni bashqilargha dönggep qoyghan bolsimu, emma xitay shirketlirining Uyghurlarni ishqa almaydighanliqi, hökümetning ularni tutqun qilip, lagérlargha qamaydighanliqining ré'alliq ikenlikini tekitlimekte.

"Inkston" ning xewiride, bu weqe alma shirkitige iPhone ishleydighan xitaydiki zawutlarning Uyghur we tibetlerni tunji qétim kemsitishi emesliki bildürülgen. Xewerde bayan qilinishiche, 2013‏-yili alma shirkitige iPhone ishlepchiqiridighan pégatron namliq shirketning xitaydiki ikki zawuti oxshashla az sanliq milletlerni kemsitish bilen eyiblen'gen iken. Eyni chaghda "Xitay emgek közitish teshkilati" bu zawutlarning tunggan, tibet we Uyghurlarni xizmetke qobul qilishni ret qilghanliqini tenqidligen iken.

Toluq bet