Алма ширкитигә запчас ишләпчиқиридиған хитайдики 7 кархана уйғур мәҗбурий әмгикини ‍ишләткән

Хитайдики американиң алма ширкитигә запчас ишләпчиқиридиған 7 карханиниң уйғур мәҗбурий әмгәк күчлирини ишлитидиғанлиқи мәлум болған. Америкадики “учур” ториниң ашкарилишичә, мәзкур учур оргини икки кишилик һоқуқ тәшкилати билән тәкшүрүш елип берип, алма ширкитини запчас һәм мулазимәт билән тәминләйдиған хитайдики 7 карханиниң уйғур мәҗбурий әмгәк күчлирини ишлитидиғанлиқини дәлиллигән.

Бу карханиларниң алтиси өзлириниң хитай һөкүмити йолға қойған әмгәк программисиға қатнашқанлиқини ейтқан. Доклатта, әмгәк программисиниң уйғурларни нишан қилғанлиқи, униңға қатнашқанларниң ‍өйидин йирақ җайларға йөткәп ишлитилидиғанлиқи, қатнишишни рәт қилғанларниң түрмигә елинидиғанлиқи тәкитләнгән. “учур” ториниң доклатида ейтилишичә, ‍алма ширкити запчас билән тәминләйдиған карханиларниң бири уйғур елиға җайлашқаникән.

Доклатта, бу карханиларниң ‍алма ширкитини антенна, кабел, қап вә башқа мәһсулат һәм мулазимәтләр билән тәминләйдиғанлиқи, лекин буниң ялғуз ‍алма ширкити билән чәклинип қалмайдиғанлиқи, бу карханиларниң йәнә микрософт, амазон, фейсибук, гугил қатарлиқ ширкәтләргиму мулазимәт қилидиғанлиқи билдүрүлгән. Илгири “ню-йорк вақти” гезити ‍алма ширкитиниң америка дөләт мәҗлисидә “уйғур мәҗбурий әмгикини чәкләш қанун лайиһәси” гә қарши паалийәт елип барғанлиқини хәвәр қилғаниди.