Alma shirkitige zapchas ishlepchiqiridighan xitaydiki 7 karxana Uyghur mejburiy emgikini ‍ishletken

Xitaydiki amérikaning alma shirkitige zapchas ishlepchiqiridighan 7 karxanining Uyghur mejburiy emgek küchlirini ishlitidighanliqi melum bolghan. Amérikadiki “Uchur” torining ashkarilishiche, mezkur uchur orgini ikki kishilik hoquq teshkilati bilen tekshürüsh élip bérip, alma shirkitini zapchas hem mulazimet bilen teminleydighan xitaydiki 7 karxanining Uyghur mejburiy emgek küchlirini ishlitidighanliqini delilligen.

Bu karxanilarning altisi özlirining xitay hökümiti yolgha qoyghan emgek programmisigha qatnashqanliqini éytqan. Doklatta, emgek programmisining Uyghurlarni nishan qilghanliqi, uninggha qatnashqanlarning ‍öyidin yiraq jaylargha yötkep ishlitilidighanliqi, qatnishishni ret qilghanlarning türmige élinidighanliqi tekitlen'gen. “Uchur” torining doklatida éytilishiche, ‍alma shirkiti zapchas bilen teminleydighan karxanilarning biri Uyghur éligha jaylashqaniken.

Doklatta, bu karxanilarning ‍alma shirkitini anténna, kabél, qap we bashqa mehsulat hem mulazimetler bilen teminleydighanliqi, lékin buning yalghuz ‍alma shirkiti bilen cheklinip qalmaydighanliqi, bu karxanilarning yene mikrosoft, amazon, féysibuk, gugil qatarliq shirketlergimu mulazimet qilidighanliqi bildürülgen. Ilgiri “Nyu-york waqti” géziti ‍alma shirkitining amérika dölet mejliside “Uyghur mejburiy emgikini cheklesh qanun layihesi” ge qarshi pa'aliyet élip barghanliqini xewer qilghanidi.